काठमाडौं।  इन्डियन प्रिमियर लिग (आईपीएल) अन्तर्गत मंगलबार राजस्थान रोयल्स र मुम्बई इन्डियन्स आमनेसामने हुँदैछन्।

खेल गुवाहाटीस्थित बारसापारा क्रिकेट स्टेडियममा नेपाली समयअनुसार साँझ ७:४५ बजे सुरु हुनेछ। सिजनका सुरुवाती दुई खेल जितेको राजस्थान यो खेल जित्दै अंकतालिकाको शीर्ष स्थानमा उक्लने लक्ष्यमा छ। अघिल्लो खेलमा पराजित भएको मुम्बई भने पुनरागमन गर्ने प्रयासमा हुनेछ।

यो खेलमा युवा ओपनर वैभव सूर्यवंशी र अनुभवी तीव्र गतिका बलर जसप्रित बुमराहबीचको प्रतिस्पर्धा विशेष आकर्षण रहने अपेक्षा गरिएको छ। सूर्यवंशीले सिजनको सुरुवाती खेलहरूमा आक्रामक ब्याटिङ गर्दै प्रभावशाली प्रदर्शन गरेका छन्।

मुम्बईका कप्तान हार्दिक पाण्ड्या पनि आजको खेलमा टोलीमा फर्किने सम्भावना छ। उनी बिरामीका कारण अघिल्लो खेलमा अनुपस्थित रहेका थिए।

राजस्थानका तर्फबाट यशस्वी जैसवाल, रियान पराग र जोफ्रा आर्चर प्रमुख खेलाडी रहनेछन् भने मुम्बईका रोहित शर्मा, सूर्यकुमार यादव र तिलक वर्माबाट राम्रो प्रदर्शनको अपेक्षा गरिएको छ।

गुवाहाटीको पिचले यस सिजनको पहिलो खेलमा तीव्र गतिका बलरलाई सहयोग गरेको थियो। त्यसैले आजको खेलमा पनि बलरहरूको भूमिका प्रभावकारी हुने अनुमान गरिएको छ।