काठमाडौं।   नेपाल टेलिकमले ग्राहक सेवामा सुधार गर्दै ‘डाटा प्याकेज सकिएपछि स्वतः ब्यालेन्स काटिने’ समस्या अन्त्य गर्ने तयारी गरेको छ। नयाँ प्रणालीअनुसार अब डाटा प्याकेजको ९० प्रतिशत प्रयोग भएपछि ग्राहकलाई पूर्वसूचना दिइनेछ, जसले बाँकी डाटाबारे समयमै जानकारी दिनेछ।

प्याकेज सकिएपछि सिधै ब्यालेन्स काटिने व्यवस्था हटाउँदै ‘पे-एज-यू-गो’ विकल्प ल्याइएको छ। यसअनुसार ग्राहकले प्याकेजबिनै इन्टरनेट प्रयोग गर्न सक्नेछन् र आवश्यकताअनुसार नयाँ प्याकेज लिने वा ‘पे-एज-यू-गो’ मोड रोज्ने निर्णय आफैं गर्न पाउनेछन्।

नेपाल टेलिकमका प्रवक्ता रवीन्द्र मानन्धरका अनुसार यो सुविधा यूएसएसडीमार्फत तीनदेखि पाँच दिनभित्र र मोबाइल एपमार्फत सातदेखि १० दिनभित्र पूर्ण रूपमा लागू हुनेछ।

दूरसञ्चार क्षेत्रमा सेवा गुणस्तरबारे उठिरहेका गुनासालाई सम्बोधन गर्न कम्पनीले ग्राहक सेवा, मोबाइल डेटा व्यवस्थापन, डिजिटल सेवा विस्तार तथा प्रशासनिक प्रक्रियामा सुधारका काम अघि बढाएको जनाएको छ। सञ्चार तथा सूचना प्रविधिमन्त्री डा. विक्रम तिमिल्सिनाले सेवा प्रवाह प्रभावकारी बनाउन निर्देशन दिएका छन्।

यसैबीच ‘वन टाइम केवाइसी’ प्रणाली लागू गर्ने तयारी पनि गरिएको छ। यस प्रणालीमार्फत ग्राहकले एकपटक मात्र विवरण बुझाएपछि पुनःपुनः कागजात पेस गर्नुपर्ने झन्झट अन्त्य हुनेछ। आगामी ३० दिनभित्र यो प्रणाली कार्यान्वयनमा ल्याउने लक्ष्य राखिएको छ।

डिजिटल रूपान्तरणअन्तर्गत ई-सिम वितरण, गुनासो व्यवस्थापन, हराएको सिम पुनःप्राप्ति तथा सिम स्वामित्व हस्तान्तरणजस्ता सेवाहरू अनलाइनबाटै उपलब्ध गराउने तयारी गरिएको छ। यसले विशेषगरी दुर्गम क्षेत्रका ग्राहकलाई सहजता दिने अपेक्षा गरिएको छ।

त्यसैगरी ‘एकल विन्दु सेवा’ सहायता कक्ष स्थापना गरी ग्राहकले एकै ठाउँबाट सबै सेवा पाउने व्यवस्था गर्ने योजना पनि अघि सारिएको छ।

साथै, फोरजी मोबाइल नेटवर्कको गुणस्तर सुधार गर्न नीतिगत व्यवस्था परिमार्जन तथा थप फ्रिक्वेन्सी उपलब्ध गराउने तयारी भइरहेको मन्त्रालयले जनाएको छ। आगामी ३० दिनभित्र सेवा गुणस्तरमा सुधार ल्याउने लक्ष्य राखिएको छ।