जुम्ला । मालपोत कार्यालयले चालु आर्थिक वर्ष २०८२/८३ को पहिलो आठ महिनामा कुल १ करोड ८६ लाख ७२ हजार रुपैयाँ राजस्व सङ्कलन गरेको जनाएको छ। साउनदेखि फागुन मसान्तसम्म विभिन्न शीर्षकमा उक्त राजस्व संकलन गरिएको हो।

कार्यालय प्रमुख मोहनबहादुर विष्टका अनुसार सबैभन्दा धेरै राजस्व घरजग्गा लिखत रजिष्ट्रेसन शुल्कबाट १ करोड २६ लाख २३ हजार ७७७ रुपैयाँ उठेको छ। त्यस्तै पुँजीगत लाभकरबाट ५७ लाख ३४ हजार ५३६ रुपैयाँ र विविध शीर्षकमा ३ लाख १३ हजार ८६९ रुपैयाँ राजस्व सङ्कलन भएको छ।

सङ्कलित राजस्वमध्ये पुँजीगत लाभकर संघीय सरकारमा पठाउने व्यवस्था रहेको छ भने पुर्जा धितो, रोक्का, संशोधन, घर कायम, नामसारी विलम्ब शुल्कलगायत अन्य शीर्षकको राजस्व प्रदेश सरकारमा पठाइने प्रावधान छ।

यसैगरी रजिष्ट्रेसन शुल्कबाट संकलित रकममध्ये ४० प्रतिशत प्रदेश सरकार र ६० प्रतिशत सम्बन्धित स्थानीय तहलाई बाँडफाँट गरिने व्यवस्था रहेको कार्यालयले जनाएको छ।