काठमाडौं। राष्ट्रिय स्वतन्त्र पार्टी (रास्वपा) का सांसद देवराज पाठकले किसानलाई खेतीको समयमा रासायनिक मल अभाव नदोहोरिने सुनिश्चितता गर्न सरकारसँग माग गरेका छन्।

प्रतिनिधिसभाको बुधबारको बैठकमा बोल्दै उनले किसानलाई आवश्यक समयमा मल उपलब्ध नहुँदा विगतमा भोगिएको समस्या फेरि दोहोरिन नहुनेमा जोड दिएका हुन् ।

सांसद पाठकले किसानलाई देशका अन्नदाता भन्दै खेतीको समयमा मलका लागि याचना गर्नुपर्ने अवस्था आउन नहुने बताए।

उनले भने, ‘किसान हाम्रा अन्नदाता हुन्। विगतमा झैँ खेतीको समयमा किसानले रासायनिक मलका लागि याचना गर्नुपर्ने नियति नदोहोरियोस्। यस वर्ष सरकारले के तयारी गरेको छ ? म सम्माननीय सभामुखमार्फत सरकारको ध्यानाकर्षण गराउन चाहन्छु।’

उनले मल आपूर्तिका लागि सरकारले गरेको तयारीबारे सदनलाई जानकारी गराउन पनि सभामुखमार्फत सरकारको ध्यानाकर्षण गराएका छन्।