काठमाडौं।  नेकपा एमालेका कार्यवाहक अध्यक्ष एवम् संसदीय दल नेता रामबहादुर थापा बादलले चैत १९ गते संसदमा दिएको अभिव्यक्तिले पार्टीभित्र लुकेका दक्षिणपन्थीलाई बाहिर ल्याइदिएको बताएका छन्।

पूर्वप्रधानमन्त्री तथा अध्यक्ष केपी शर्मा ओलीको पक्राउको विरोधमा बुधबार पोखरामा आयोजित जिल्ला भेलालाई सम्बोधन गर्दै रामबहादुर थापा ‘बादल’ले आफूले संसदमा पार्टीकै आधिकारिक धारणा राखेको तर त्यसबाट पार्टीभित्रका दक्षिणपन्थी प्रवृत्तिहरू प्रभावित भएको बताएका हुन्।

उनले भने, ‘पार्टीको उपाध्यक्षले एउटा सार्वजनिक स्टेटमेन्ट उहाँले जारी गर्नुभयो कि दल नेताले त्यहाँ जुन धारणा राख्नुभयो, संसदमा, त्यो पार्टीका स्थापित मान्यता विपरीत छ। त्यसमा घोर आपत्ति छ। यो बारेमाचाहिँ सचिवालयको बैठक राखेर चाहिँ उपयुक्त निर्णय लिइने छ भनेर ।

बादलले सदनमा सम्बोधनका क्रममा भनेका थिए, ‘यो अभूतपूर्व विजयमा आन्तरिक रूपमा क-कसको निर्णायक भूमिका रह्यो? तथ्यहरूले के स्पष्ट गर्दछन् भने मुख्यतः नेपाली सेना, ब्युरोक्रेसी, सुशीला कार्की सरकार, कार्की आयोग, बारबरा फाउन्डेसन, एनजिओ आदि संस्था तथा पात्रहरूको यो विजयमा निर्णायक भूमिका रह्यो।’

पार्टीको स्थापित नीति र धारणा विपरीत अभिव्यक्ति दिएको भन्दै उपाध्यक्ष विष्णु पौडेलले आपत्ति जनाएका थिए।

पौडेलले भनेका थिए,‘प्रतिनिधि सभाको आजको बैठकमा नेकपा (एमाले) को दल नेताको हैसियतले रामबहादुर थापाले व्यक्त गर्नुभएको विचार पार्टीका स्थापित नीति र मान्यता विपरीत छन् ।’

भोलिपल्टै सचिवालयको बैठक राखेर एमालेले बादलको अभिव्यक्ति सच्याएको थियो। सचिवालय बैठकले बादलको अभिव्यक्ति सच्याउँदै नेपाली सेना, कर्मचारीतन्त्रप्रति एमालेको वैरभाव नरहेको निष्कर्ष निकालेको थियो।

बुधबार पोखरामा बादलले आफूले सदनमा बोलेपछि एमालेभित्र पैदा भएको हलचललाई अन्तरसंघर्षको नाम दिएका छन् ।

‘यहाँ हेर्नुहोस् है अन्तरसंघर्षको स्थिति कस्तो छ, मान्छेहरूचाहिँ त्यो वक्तव्य उत्तेजित भए,’ उनले भने, ‘भित्र लुकेका थिए, बाहिर देखिए। त्यो स्टेटमेन्टलेचाहिँ पार्टीभित्रको दक्षिणपन्थी प्रवृत्तिलाई चाहिँ एक्सपोज गरेको मात्रै हो, त्यो। कन्फ्युज भएको होइन। त्यो कन्फ्युजनलाई चाहिँ प्रष्ट पार्न स्टेटमेन्ट (सदनमा अभिव्यक्ति) दिइएको हो,’ उनले भने।

आफूले सदनमा जे बोलेको हो। जे स्टेटमेन्ट दिइएको हो, त्यो पार्टीको लाइन अनुसार नै भएको उनको आज पनि जिकिर थियो।

त्यसदिनको अभिव्यक्ति दक्षिणपन्थीहरूलाई र पार्टीभित्र लुकेका दक्षिणपन्थीहरूलाई पनि आक्रमण भएको उनको तर्क छ। ‘त्यो स्टेटमेन्टले भित्रका र बाहिरका दक्षिणपन्थी एक्सपोज भए। यो चाहिँ पार्टीको लाइन त्यहाँ बोलिएको थियो,’ उनले भने।