काठमाडौं। सरकारले सार्वजनिक यातायातको भाडा वृद्धि गरेको छ। पेट्रोलियम पदार्थको मूल्य बढेपछि भाडादर समायोजन गरिएको हो।

नेपाल यातायात व्यवसायी राष्ट्रिय महासंघका अनुसार वैज्ञानिक भाडादर समायोजन प्रणालीअनुसार यात्रुवाहक सवारीको भाडा साविकको दरभन्दा १६.७१ प्रतिशतले बढाइएको छ।

त्यसैगरी, मालवाहक सवारीतर्फ पहाडी क्षेत्रका लागि २१.६८ प्रतिशतले भाडा वृद्धि गरिएको छ भने तराई क्षेत्रका लागि १५.७५ प्रतिशतले भाडा बढाउने निर्णय भएको छ।

खाडी मुलुकमा चर्किएको युद्धका कारण पेट्रोलियम पदार्थको आपूर्ति प्रभावित भई मूल्य वृद्धि हुँदा नेपालमा पेट्रोल प्रतिलिटर २०२ रुपैयाँ र डिजेल प्रतिलिटर १८२ रुपैयाँ पुगेको छ। तेलको मूल्य बढेसँगै यातायात व्यवसायीहरूले भाडादर समायोजन गर्न सरकारलाई दबाब दिँदै आएका थिए। सोही दबाबका आधारमा सरकारले सार्वजनिक सवारीको भाडा वृद्धि गरेको हो।