काठमाडौं । एमाले अध्यक्ष तथा पूर्वप्रधानमन्त्री केपी शर्मा ओलीको पित्तथैलीमा रहेको पत्थरीको शल्यक्रिया सोमबार गर्ने तयारी गरिएको छ। स्वास्थ्य अवस्था बिग्रिएको भन्दै अपरेशन अनिश्चित भएको चर्चा चले पनि चिकित्सकहरूले शनिबार बेलुकासम्मको रिपोर्टअनुसार सोमबार शल्यक्रिया गर्न कुनै समस्या नरहेको बताएका छन्।

त्रिवि शिक्षण अस्पतालका निर्देशक डा. सुवास आचार्यका अनुसार अपरेशनअघि गरिनुपर्ने सबै परीक्षण पूरा भइसकेका छन्। ती परीक्षणका रिपोर्ट सकारात्मक आएकाले सोमबार नै शल्यक्रिया गर्न सकिने निष्कर्षमा चिकित्सकहरू पुगेका हुन्।

जेन-जी आन्दोलन जाँचबुझ प्रतिवेदनको सिफारिसअनुसार ओलीलाई चैत १३ गते भक्तपुरको गुण्डुस्थित निवासबाट पक्राउ गरिएको थियो। स्वास्थ्यमा समस्या देखिएपछि सोही दिनदेखि उनलाई महाराजगञ्जस्थित त्रिवि शिक्षण अस्पतालमा भर्ना गरिएको थियो। हाल उनी एनेक्स-१ को शय्या नम्बर ५०१ मा चिकित्सकीय निगरानीमा उपचाररत छन्।

सर्वोच्च अदालतको आदेशअनुसार प्रहरीले ओली र उनीसँगै पक्राउ परेका कांग्रेस नेता रमेश लेखकलाई चैत २६ गते जिम्मा जमानीमा रिहा गरेको थियो। लेखक घर फर्किसकेका छन् भने ओलीलाई भने पत्थरीको उपचार नगरी डिस्चार्ज गर्न चिकित्सकहरूले अनुमति दिएका छैनन्।

तीनपटक मिर्गौला प्रत्यारोपण गरिसकेका ओलीको पित्तथैलीमा पत्थरी देखिएको हो। पित्तथैलीमा कोलेस्ट्रोल र बिलिरुबिन जम्मा भई बन्ने ठोस पदार्थलाई गलब्लाडर स्टोन भनिन्छ।