काठमाडौं। नवौँ हिन्द महासागर सम्मेलनमा सहभागी हुन मौरिसस पुगेका परराष्ट्रमन्त्री शिशिर खनालले प्रधानमन्त्री बालेन्द्र शाह (बालेन) को सम्भावित भारत भ्रमणबारे खुलासा गरेका छन्।

भारतीय समकक्षी एस. जयशंकरसँगको भेटपछि सञ्चारकर्मीसँग कुरा गर्दै मन्त्री खनालले भारतका प्रधानमन्त्री नरेन्द्र मोदीले बालेनलाई औपचारिक निम्तो दिएको र उक्त निम्तो स्वीकार गरिएको खुलासा गरेका हुन् ।

उनका अनुसार भ्रमणबारे प्रारम्भिक सहमति भए पनि यसको मिति र कार्यतालिका निर्धारणका लागि थप कूटनीतिक संवाद आवश्यक छ।

उक्त भेटवार्तामा उच्चस्तरीय भ्रमणअघि सचिवस्तरमा तयारी भेटघाट गर्ने समझदारी पनि बनेको जनाइएको छ। यसै क्रममा भारतीय विदेश मन्त्रालयका सचिव विक्रम मिस्री निकट भविष्यमा नेपाल आउने तयारीमा रहेको बताइएको छ, जसले भ्रमणका अन्य पक्षहरू टुंग्याउने अपेक्षा गरिएको छ।

मन्त्री खनालले भारतीय सञ्चारमाध्यमसँग कुराकानी गर्दै प्रधानमन्त्रीले निम्तो स्वीकार गरिसकेको तर समय निर्धारण सम्बन्धित निकायहरूले गर्ने बताए।

तर, परराष्ट्र मन्त्रालयका केही अधिकारीहरूले भने यस विषयमा औपचारिक जानकारी नभएको बताएका छन्। उनीहरूका अनुसार मन्त्रीको अभिव्यक्तिबाट नै यो विषय सार्वजनिक भएको हो र मन्त्रालयस्तरमा हालसम्म कुनै स्पष्ट छलफल भएको छैन।

नेपालका लागि भारतीय राजदूत नविन श्रीवास्तवसँगको भेटमा समेत यस विषयमा चर्चा नभएको ती अधिकारीहरूको भनाइ छ।

यसअघि नेपालमा प्रधानमन्त्री नियुक्त भएपछि पहिलो विदेश भ्रमण प्रायः भारतबाट सुरु हुने परम्परा रहेको थियो। तर पछिल्ला वर्षहरूमा यो परम्परामा परिवर्तन देखिएको छ। उदाहरणका लागि केपी शर्मा ओलीले आफ्नो कार्यकालमा पहिलो भ्रमण चीनबाट सुरु गरेका थिए।

विश्लेषकहरूका अनुसार प्रधानमन्त्री बालेन शाह परम्परागत ढाँचाभन्दा फरक शैली अपनाउने भएकाले निम्तो पाएलगत्तै भ्रमण गर्नेभन्दा पनि आवश्यक तयारीपछि मात्र निर्णय लिने सम्भावना देखिन्छ।