काठमाडौं । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीको पित्तथैलीमा रहेको पत्थरी निकाल्ने शल्यक्रिया सम्पन्न भएको छ।

त्रिवि शिक्षण अस्पताल, महाराजगञ्जका निर्देशक डा. सुवास आचार्यका अनुसार ओलीको शल्यक्रिया सफलतापूर्वक सम्पन्न भएको हो। उनलाई अपरेसन थिएटर (ओटी)बाट वार्डमा सार्ने तयारी भइरहेको छ। विस्तृत स्वास्थ्य अवस्थाबारे केहीबेरमै प्रेस नोटमार्फत जानकारी दिइने अस्पतालले जनाएको छ।

यसअघि नयाँ सरकार गठन भएको भोलिपल्ट ‘जेनजी आन्दोलन’ दमन गरेको आरोपमा ओली पक्राउ परेका थिए। पक्राउ परेकै दिनदेखि उनी उपचारका लागि त्रिवि शिक्षण अस्पतालमा भर्ना भएका थिए।

ओली पक्राउ परेपछि उनकी पत्नी राधिका शाक्यले गैरकानुनी हिरासतको आरोप लगाउँदै सर्वोच्च अदालतमा बन्दी प्रत्यक्षीकरणको निवेदन दर्ता गराएकी थिइन्।

सर्वोच्च अदालतले चैत २३ गते ओली र तत्कालीन गृहमन्त्री रमेश लेखकविरुद्धको अनुसन्धान चैत २६ भित्र टुंग्याउन आदेश दिएको थियो। साथै, तोकिएको समयभित्र अनुसन्धान नसकिए शर्तसहित रिहा गर्न निर्देशन दिएको थियो।

सोही आदेशअनुसार प्रहरीले ओलीलाई अस्पतालबाट पत्नी राधिका शाक्यको जिम्मा लगाएको थियो। थुनामुक्त भए पनि शल्यक्रिया गर्नुपर्ने भएकाले उनी अस्पतालमै बस्दै आएका थिए।

यसअघि पनि ओलीको दुइचोटी किड्नी ट्रान्सप्लान्टका लागि दुइचोटी शल्यक्रिया गरिएको थियो