काठमाडौं । आसिफ शेखको कीर्तिमानी दोहोरो शतकको प्रेरणामा एपीएफ क्लबले मधेश प्रदेशलाई ७४ रनले पराजित गर्दै प्रतियोगितामा महत्वपूर्ण जित हासिल गरेको छ।

यससँगै मधेश प्रदेशको फाइनल पुग्ने सम्भावना समाप्त भएको छ भने सुदूरपश्चिम प्रदेशले फाइनलमा स्थान सुरक्षित गरेको छ। जितसँगै एपीएफले जय ट्रफीमा पनि स्थान बनाएको छ।

उपाधिका लागि अब सुदूरपश्चिम प्रदेश र त्रिभुवन आर्मी क्लबबीच प्रतिस्पर्धा हुने भएको छ।

एपीएफले दिएको ३९१ रनको कीर्तिमानी लक्ष्य पछ्याएको मधेशले ५० ओभरमा ८ विकेट गुमाएर ३१६ रन बनाउँदै राम्रो संघर्ष गरे पनि लक्ष्य भेट्टाउन सकेन।

यस संस्करणसँगै प्रधानमन्त्री कपको इतिहासमा पहिलोपटक कुनै विभागीय टोलीबाहेकको टिम फाइनलमा पुगेको हो।

प्रतियोगिताको इतिहास हेर्दा पहिलो संस्करणमा नेपाल पुलिस क्लब र आर्मीबीचको फाइनल नतिजाविहीन बनेको थियो। दोस्रो संस्करणमा एपीएफले आर्मीलाई ६ विकेटले हराउँदै उपाधि जितेको थियो भने तेस्रो संस्करणमा पुलिसले आर्मीलाई ४ विकेटले हराएको थियो।

चौथो संस्करणमा आर्मीले एपीएफलाई ३३ रनले पराजित गर्दै च्याम्पियन बनेको थियो भने पाँचौं संस्करणमा एपीएफले आर्मीलाई ४ विकेटले हराउँदै उपाधि हात पारेको थियो।

छैटौं र सातौं संस्करणमा भने नेपाल पुलिस क्लबले लगातार आर्मीलाई ६-६ विकेटले पराजित गर्दै उपाधि जितेको थियो।