काठमाडौं। मलेसिया पुग्ने उद्देश्यले अन्डमान सागर हुँदै यात्रा गरिरहेका रोहिङ्ग्या शरणार्थी र बङ्गलादेशी नागरिक बोकेको डुङ्गा डुब्दा कम्तीमा २५० जना बेपत्ता भएको संयुक्त राष्ट्रसङ्घीय निकायहरूले जनाएका छन्।

संयुक्त राष्ट्रसङ्घीय शरणार्थी उच्चायुक्तको कार्यालय (युएनएचसिआर) र अन्तर्राष्ट्रिय आप्रवासन सङ्गठन (आइओएम)ले मंगलबार जारी गरेको संयुक्त विज्ञप्तिअनुसार बङ्गलादेशको कोक्स बजारस्थित टेकनाफ क्षेत्रबाट मलेसियातर्फ प्रस्थान गरेको उक्त डुङ्गा अन्डमान सागरमा पल्टिएको हो। दुर्घटनापछि यात्रामा रहेका सबै व्यक्ति बेपत्ता भएको आशङ्का गरिएको छ।

डुङ्गा कहिले डुबेको हो भन्नेबारे यकिन विवरण अझै प्राप्त नभएको र बुधबारसम्म खोज तथा उद्धार कार्यको अवस्थाबारे पनि स्पष्टता नआएको बताइएको छ।

प्रारम्भिक अनुमानअनुसार अत्यधिक भीड, तीव्र हावा र खराब समुद्री अवस्थाका कारण डुङ्गाले सन्तुलन गुमाएर दुर्घटना भएको हुन सक्ने देखिएको छ।

यो घटनाले रोहिङ्ग्या समुदायले भोगिरहेको दीर्घकालीन विस्थापन समस्या र सुरक्षित तथा दीगो समाधानको अभावलाई फेरि उजागर गरेको युएनएचसिआर र आइओएमले बताएका छन्। म्यान्माको राखाइन राज्यमा जारी हिंसा र अस्थिरताका कारण उनीहरूको स्वदेश फिर्ती अझै अनिश्चित बनेको छ।

त्यसैगरी, बङ्गलादेशका शरणार्थी शिविरहरूमा सीमित मानवीय सहायता, शिक्षा र रोजगारी अवसरको अभावले धेरैलाई जोखिमपूर्ण समुद्री यात्रा रोज्न बाध्य बनाइरहेको उल्लेख गरिएको छ। यस्तो परिस्थितिले मानव तस्करी र समुद्री दुर्घटनाको जोखिम थप बढाएको छ।

हाल बङ्गलादेशले म्यान्माबाट विस्थापित १० लाखभन्दा बढी रोहिङ्ग्या शरणार्थीलाई आश्रय दिँदै आएको छ। युएनएचसिआर र आइओएमले उनीहरूको जीवनरक्षक सहयोग सुनिश्चित गर्न अन्तर्राष्ट्रिय समुदायसँग थप आर्थिक सहयोग र ऐक्यबद्धता बढाउन आग्रह गरेका छन्।

अन्डमान सागरमा भएको यो दुर्घटना केवल मानवीय त्रासदी मात्र नभई क्षेत्रीय शरणार्थी संकटको गहिरो स्वरूप र अन्तर्राष्ट्रिय उदासीनताको परिणामसमेत भएको टिप्पणी गरिएको छ।