काठमाडौं । राष्ट्रिय स्वतन्त्र पार्टी (रास्वपा) ले मन्त्री र सांसदहरूका लागि लेबी निर्धारण गरेको छ।

बिहीबार सिंहदरबारमा बसेको संसदीय दलको बैठकले मन्त्री र सांसदहरूको लेबी सम्बन्धी प्रस्ताव पारित गरेको मुख्य सचेतक कबिन्द्र बुर्लाकोटीले जानकारी दिए।

उनका अनुसार सांसदहरूले मासिक १६ हजार ५ सय रुपैयाँ र मन्त्रीहरूले १८ हजार रुपैयाँ लेबी तिर्नुपर्ने व्यवस्था गरिएको छ।

त्यस्तै, स्वकीय सचिवका लागि २ हजार रुपैयाँ लेबी तोकिएको छ। यो व्यवस्था हाल मन्त्रीका स्वकीय सचिवहरूका हकमा लागू हुनेछ।

सांसदहरूले भविष्यमा स्वकीय सचिव राख्ने व्यवस्था भएमा उनीहरूका लागि पनि यही दरमा लेबी लागू हुने बुर्लाकोटीले बताए। त्यस अवस्थामा सांसदका स्वकीयहरूले पनि मासिक २ हजार रुपैयाँ पार्टीलाई तिर्नुपर्ने व्यवस्था रहनेछ।