काठमाडौं। चिनियाँ विदेशमन्त्री वाङ यीले इरानी विदेशमन्त्री अब्बास अराघचीलाई होर्मुज जलमार्गमा सामान्य आवागमन पुनः स्थापना गर्न आग्रह गरेका छन्।

वाङ यीले उक्त जलमार्गमा इरानको सार्वभौमसत्ता र सुरक्षाको सम्मान हुनुपर्ने उल्लेख गर्दै, साथै त्यहाँबाट हुने समुद्री आवागमनको स्वतन्त्रता र सुरक्षा सुनिश्चित गर्नुपर्नेमा जोड दिएका छन्। उनले यो मार्ग सबै देशको हितसँग जोडिएको भएकाले खुला रहनु आवश्यक रहेको बताए।

चीनले युद्धविराम कायम राख्ने र कूटनीतिक वार्ता पुनः सुरु गर्ने पक्षमा समर्थन जनाएको पनि वाङ यीले बताएका छन्।

यसअघि डोनाल्ड ट्रम्प ले सामाजिक सञ्जालमार्फत होर्मुज जलमार्ग सधैँका लागि खोलिने दाबी गरेका थिए। उनले यो कदम चीनलगायत सबै देशको हितमा रहेको बताएका थिए।

होर्मुज जलमार्ग विश्वकै अत्यन्त महत्वपूर्ण समुद्री मार्गमध्ये एक हो, जसबाट विश्वको करिब २० प्रतिशत तेल तथा ग्यास आपूर्ति हुने अनुमान गरिन्छ।

विश्लेषकहरूका अनुसार यो मार्ग अवरुद्ध भए ऊर्जा आपूर्ति शृङ्खला प्रभावित हुने र अन्तर्राष्ट्रिय बजारमा तेल तथा ग्यासको मूल्यमा तीव्र उतारचढाव आउन सक्ने सम्भावना रहन्छ।