काठमाडौं । अमेरिकी गायक तथा टिकटक स्टार डेभिड एन्थोनी बर्कलाई १४ वर्षीया एक किशोरीको हत्या आरोपमा प्रहरीले पक्राउ गरेको छ।

गत वर्ष बेपत्ता भएकी सेलेस्टे रिभास हर्नान्डेजको मृत्युमा संलग्नताको आशंकामा २१ वर्षीय बर्कलाई प्रहरीले बिहीबार नियन्त्रणमा लिएको हो।

लस एन्जलस प्रहरीले जनाएको अनुसार, ती किशोरीको शवका अवशेष गत सेप्टेम्बरमा बर्ककै नाममा दर्ता गरिएको एक टेस्ला कारभित्र फेला परेको थियो। हलिउडस्थित ‘टो-यार्ड’ मा राखिएको कारबाट दुर्गन्ध आएपछि गरिएको तलासीमा, अगाडिको बुट क्षेत्रमा रहेको झोलाभित्र किशोरीको टाउको र शरीरका अन्य भाग भेटिएको अदालतको कागजातमा उल्लेख छ।

चिकित्सकहरूका अनुसार, शव अत्यन्तै सडेको अवस्थामा भेटिएको थियो, जसले उनी केही हप्ता अघि नै मारिएको अनुमान गर्न सकिन्छ। त्यसपछि, अनुसन्धान प्रभावित हुन नदिन एक न्यायाधीशले गत नोभेम्बरमा मृत्युसम्बन्धी सबै अभिलेख गोप्य राख्न निर्देशन दिएका थिए।