काठमाडौं ।  इन्डियन प्रिमियर लिग (आइपीएल) २०२६ मा पन्जाब किङ्सले आफ्नो अपराजित क्रम जारी राख्दै वानखेडे स्टेडियममा मुम्बई इन्डियन्सलाई ७ विकेटले पराजित गरेको छ।

बिहीबार सम्पन्न खेलमा पन्जाबले १६.३ ओभरमै १९६ रनको लक्ष्य पार गर्दै सिजनको चौथो जित हात पारेको हो। यो जितसँगै पन्जाब ५ खेलमा ४ जित र १ नतिजाविहीन खेलसहित ९ अंकका साथ अंक तालिकाको शीर्ष स्थानमा पुगेको छ।

टस जितेर पहिला ब्याटिङ गरेको मुम्बईले २० ओभरमा ६ विकेटको क्षतिमा १९५ रन मात्र बनाउन सक्यो। क्विन्टन डिककले ६० बलमा ८ चौका र ७ छक्कासहित अविजित ११२ रनको शानदार शतक बनाए पनि टोलीलाई जित दिलाउन सकेनन्। नमन धीरले ५० रन जोडे भने कप्तान हार्दिक पाण्ड्या १४ रनमा आउट भए। बाँकी खेलाडीहरू दोहोरो अंकमा पुग्न सकेनन्।

पन्जाबका लागि अर्शदीप सिंहले प्रभावशाली बलिङ गर्दै ४ ओभरमा २२ रन दिएर ३ विकेट हात पारे र ‘म्यान अफ द म्याच’ बने। मार्को जान्सन र शशांक सिंहले एक–एक विकेट लिए।

जवाफी ब्याटिङमा पन्जाबको सुरुवात उत्कृष्ट रह्यो। ओपनर प्रभसिमरन सिंहले ३९ बलमा ११ चौका र २ छक्कासहित अविजित ८० रनको पारी खेले। उनले कप्तान श्रेयस ऐय्यरसँग तेस्रो विकेटका लागि १३९ रनको मूल्यवान साझेदारी गरे। ऐय्यरले ३५ बलमा ५ चौका र ४ छक्कासहित ६६ रन जोडे। प्रियांस आर्या र कुपर कोनोली दुवै १५–१५ रनमा आउट भए भने मार्को जान्सन १० रनमा अविजित रहे।

मुम्बईका लागि एएम घजनफरले २ विकेट लिए भने शार्दुल ठाकुरले १ विकेट हात पारे। यो हारसँगै मुम्बईको सिजन अझ कमजोर बनेको छ। पहिलो खेलमा कोलकातालाई हराएपछि मुम्बईले त्यसयता दिल्ली क्यापिटल्स, राजस्थान रोयल्स, रोयल च्यालेन्जर्स बेंगलुरु र पन्जाबसँग लगातार पराजय भोग्दै ५ खेलमा १ जित र ४ हारसहित २ अंकमा झर्दै नवौं स्थानमा पुगेको छ।

पन्जाबले यसअघि गुजरात टाइटन्स, चेन्नई सुपर किङ्स, सनराइजर्स हैदरावाद र मुम्बईलाई पराजित गर्दै अपराजित यात्रा कायम राखेको हो। कोलकाता नाइट राइडर्ससँगको खेल वर्षाका कारण रद्द भएको थियो।

आज (शुक्रबार) आइपीएलको २५औं खेलमा गुजरात टाइटन्स र कोलकाता नाइट राइडर्सबीच अहमदाबादको नरेन्द्र मोदी स्टेडियममा प्रतिस्पर्धा हुनेछ।