काठमाडाैं।  नेपाल कम्युनिष्ट पार्टी (एमाले)का सचिव महेश बस्नेतले निर्वाचनलाई लोकतन्त्रको सुन्दर पक्ष भएको बताएका छन्।

बस्नेतले शनिबार फेसबुकमा एक स्टाटस लेख्दै चुनावमा हार जितलाई सामान्य प्रक्रिया भएको बताए। उनले साँचो नेताको प्रमुख जिम्मेवारी राष्ट्रको प्रतिष्ठा उकास्नु र जनताको जीवनमा खुसी ल्याउनु रहेको बताएका हुन्।

उनले कहिलेकाहीँ जनताहरू भ्रममा पर्न सक्ने र निर्णयमा चुक्न सक्ने अवस्था रहने बताए पनि समयसँगै सत्य स्थापित हुने विश्वास व्यक्त गरेका छन्। ‘समयसँगै सही मूल्य र मान्यता पुनः स्थापित हुन्छ,’ उनको भनाइ छ।

बस्नेतले भक्तपुरवासीसहित देशभरका नागरिकलाई सम्बोधन गर्दै आफूहरू जनताको सेवकका रूपमा सधैं साथमा रहने प्रतिबद्धता जनाएका छन्। उनले नागरिकले भोग्ने दुःख, समस्या र अप्ठ्यारोमा साथ दिन तथा उनीहरूको भरोसा कायम राख्न निरन्तर क्रियाशील रहने बताएका छन्।