काठमाडौं।  टिकटकले आफ्नो Q4 2025 कम्युनिटी गाइडलाइन्स इन्फोर्समेन्ट रिपोर्ट सार्वजनिक गर्दै प्लेटफर्ममा सुरक्षित डिजिटल वातावरण कायम गर्न गरिएको कारबाहीबारे विवरण सार्वजनिक गरेको छ।

रिपोर्टअनुसार २०२५ को अक्टोबरदेखि डिसेम्बरसम्मको अवधिमा नेपालमा मात्र १९ लाख ३२ हजार ५७५ भिडियो हटाइएको हो । यस अवधिमा कन्टेन्ट हटाउने दर ९९.९ प्रतिशत रहेको र ९८.४ प्रतिशत भिडियो २४ घण्टाभित्रै हटाइएको कम्पनीले जनाएको छ।

विश्वव्यापी रूपमा सोही अवधिमा १७ करोड ५३ लाखभन्दा बढी भिडियो हटाइएको छ, जुन कुल अपलोडको करिब ०.५ प्रतिशत हो। तीमध्ये अधिकांश सामग्री स्वचालित प्रणालीमार्फत पहिचान गरिएको टिकटकले उल्लेख गरेको छ।

यस अवधिमा १४ करोडभन्दा बढी नक्कली एकाउन्ट हटाइएको तथा १३ वर्षमुनिका हुन सक्ने शंकास्पद करोडौँ खाताहरू पनि निष्क्रिय गरिएको रिपोर्टमा उल्लेख छ।

हटाइएका सामग्रीमध्ये धेरैजसो संवेदनशील सामग्री, सुरक्षा उल्लङ्घन, भ्रामक सूचना तथा एआई-जनरेटेड कन्टेन्टसँग सम्बन्धित रहेको टिकटकले जनाएको छ।