काठमाडौं । गृहमन्त्री सुधन गुरुङ प्रधानमन्त्री बालेन्द्र शाहलाई भेट्न पुगेका छन् । 

विवादित व्यवसायी दीपक भट्टसँगको व्यावसायिक साझेदारी तथा उनले संलग्न रहेको कम्पनीमा गुरुङकै सेयर रहेको तथ्य सार्वजनिक भएपछि गृहमन्त्रीको चर्को आलोचना भइरहेको छ। यही विषयमा स्पष्टीकरण र आगामी कदमबारे प्रधानमन्त्रीसँग प्रत्यक्ष संवाद गर्न गुरुङ प्रधानमन्त्री कार्यालय पुगेका हुन्।

दीपक भट्ट ‘बिचौलिया’ तथा विवादास्पद कारोबारीका रूपमा चिनिँदै आएका व्यक्ति हुन्। उनी अहिले हिरासतमा छन्।  भट्टसँगको आर्थिक सम्बन्ध खुलेपछि गृहमन्त्री गुरुङको नैतिक जिम्मेवारी, पारदर्शिता र पदमाथिको आचरणबारे गम्भीर प्रश्न उठिरहेका छन्। सुरक्षा संयन्त्रका उच्च जिम्मेवारी सम्हाल्ने व्यक्तिसँग विवादित व्यवसायीको साझेदारी हुनु सरकारकै विश्वसनीयतामाथि घाउ भएको भन्दै उनीमाथि राजीनामाको दबाब पनि बढ्दो छ। तर राष्ट्रिय स्वतन्त्र पार्टी भने यो विषयमा मौन छ। 

गुरुङले प्रधानमन्त्रीलाई आफ्नो पक्ष खुलाउने, परिस्थिति बुझाउने र सम्भावित कदमका बारेमा मार्गदर्शन खोज्ने बताइएको छ। प्रधानमन्त्रीले दिने निर्देशनले नै गुरुङको मन्त्रालयको आगामी अवस्था निर्धारण गर्ने देखिन्छ।