काठमाडौं। विद्यार्थी संगठनमाथि प्रतिबन्ध गर्ने सरकारी घोषणाको विरोधमा काठमाडौँमा कालो बेलुन उडाएर प्रदर्शन गरिएको छ।

नेपाल विद्यार्थी संघ र अखिल नेपाल राष्ट्रिय स्वतन्त्र विद्यार्थी युनियन ले संयुक्त रूपमा राजधानीमा विरोध प्रदर्शन गरेका हुन्। उनीहरूले विद्यार्थी संगठनमाथिको प्रतिबन्धलाई अलोकतान्त्रिक र दमनकारी कदम भनेका छन्।

नेविसंघका केन्द्रीय सदस्य मात्रिका तिमिल्सिनाले शान्तिपूर्ण आन्दोलनमा सहभागी विद्यार्थीलाई हिरासतमा लिएको घटनाप्रति आपत्ति जनाए। उनका अनुसार सरकारले विद्यार्थी संगठनमाथि प्रतिबन्धको घोषणा गरेर पञ्चायतकालमा समेत नभएको अभ्यास गरेको छ।

तिमिल्सिनाले सरकारले प्रतिबन्धको निर्णय फिर्ता नलिए देशभर सशक्त आन्दोलन गर्ने चेतावनी दिएका छन्। यसअघि सिंहदरबारमा गरिएको प्रदर्शनका क्रममा केही विद्यार्थीलाई प्रहरीले नियन्त्रणमा लिएको थियो।

तस्वीर: