काठमाडौं । चर्चित कन्टेन्ट क्रिएटर निशान मैनालीको परिवारमाथि मिटरब्याजी कारोबार गरेको आरोप सार्वजनिक भएको छ। सर्लाहीको बरहथवाका भागनारायण महतो र उमादेवी महतोले ११ वर्षअघि लिएको १ लाख ५० हजार ऋणको बदलामा ६५ लाख रुपैयाँ र १० कट्टा जग्गा असुलिएको आरोप लगाएका छन्।

आरोपअनुसार, २०७४ सालतिर उमादेवीको दाइको नाममा रहेको १० कठ्ठा जग्गा पछि उनको नाममा नामसारी गरिएको थियो। उक्त जग्गा भागनारायणले लामो समयको मेहनतले किनेको र पछि परिवारभित्रै नामसारी गरिएको बताइएको छ।

पछिल्लो चरणमा ऋण लिएको भन्दै निशान मैनाली पक्षले सोही जग्गालाई ‘दृष्टिबन्धक’ राख्न दबाब दिएको आरोप छ। त्यसपछि निशानले उमादेवीलाई लिएर वडा कार्यालयमा चार किल्ला सिफारिस गराई मालपोत कार्यालयमार्फत दृष्टिबन्धकको नाममा जग्गा आफ्नो आमाको नाममा पास गराएको दाबी गरिएको छ। चार दिनमै उक्त जग्गा निशानकी आमाको नाममा लालपुर्जा बनेको आरोपसमेत छ।

निरक्षर भएकी उमादेवीले सो प्रक्रिया बुझ्न नसकेको बताइएको छ। त्यसपछि पनि निशान परिवारले जग्गा दृष्टिबन्धक मात्र भएको भन्दै थप रकम माग गरिरहेको आरोप छ।

आरोप अनुसार, महतो परिवार मिटरब्याजको चक्रमा फसेको र तमसुकमा राखिएको १० लाख ऋण तिर्न नसक्ने अवस्थामा पुगेको थियो। विदेश (बहराइन) बाट भागनारायणले पठाएको रकम समेत निशानकै घरमा बुझाउनुपर्ने अवस्था सिर्जना भएको र नपुगेपछि गाउँलेसँग समेत ऋण लिएर तिर्न बाध्य भएको उमादेवीले बताएकी छन्।