काठमाडौं । संयुक्त राष्ट्रिय सुकुम्बासी मोर्चाका कार्यवाहक अध्यक्ष नारायण परिश्रमीलाई प्रहरीले पक्राउ गरेको छ । शुक्रबार बिहान उनलाई पक्राउ गरिएको जिल्ला प्रहरी परिसर काठमाडौंका एसपी पवन भट्टराईले जानकारी दिएका छन्।

प्रहरीका अनुसार परिश्रमी आफैँ सुकुम्बासी नरहेको खुलेको छ। ‘हामीले नारायणलाई नियन्त्रणमा लिएका छौँ,’ एसपी भट्टराईले भने, ‘पहिला पनि उहाँको भूमिका शंकास्पद देखिएको थियो, त्यसैले यसपटक पहिले नै पक्राउ गरिएको हो।’

काठमाडौं महानगरपालिकाले यसअघि थापाथलीस्थित सुकुम्बासी बस्ती हटाउने प्रयास गर्दा परिश्रमीले प्रहरीमाथि पेट्रोल बम प्रहार गरेको आरोप छ। सो घटनामा पनि उनलाई प्रहरीले पक्राउ गरेको थियो।