युद्धविराम तीन साता थपिएको ट्रम्पको घोषणा
Nepal One HD ११ वैशाख २०८३ १२:१०
एजेन्सी। अमेरिकी राष्ट्रपति डोनाल्ड ट्रम्पले इजरायल र लेबनानबीचको कमजोर युद्धविरामलाई थप तीन साताका लागि विस्तार गरिएको घोषणा गरेका छन्।
आगामी आइतबार समाप्त हुन लागेको युद्धविरामको अवधि थपिएसँगै ट्रम्पले निकट भविष्यमा इजरायली र लेबनानी नेतालाई ह्वाइट हाउसमा स्वागत गर्ने इच्छा समेत व्यक्त गरेका छन्।
सामाजिक सञ्जालमा पोस्ट गर्दै राष्ट्रपति ट्रम्पले मध्यपूर्वमा जारी तनावका बीच लेबनानमा शान्ति कायम राख्न युद्धविराम अवधि थपिएको बताएका हुन्।
इरानको सन्दर्भमा उनले कडा रणनीति अपनाउने संकेत गरेका छन्। इरानसँगको सम्झौताका लागि आफू कुनै दबाबमा नरहेको उल्लेख गर्दै उनले तेहरानलाई चेतावनी दिएका छन्।
‘मसँग संसारभरका लागि पर्याप्त समय छ, तर इरानसँग छैन। समयको घडी टिकटक गर्दै अघि बढिरहेको छ’, ट्रम्पले लेखेका छन्।
उनले इरानसँगको सम्झौतामा आफूले कुनै हतार नगर्ने स्पष्ट पार्दै वर्तमान परिस्थितिमा तेहरानले छिटो निर्णय लिनुपर्ने बताएका छन्।
अमेरिकी प्रशासनको यो कदमले मध्यपूर्वमा जारी द्वन्द्व कम गर्न केही आशा जगाएको भए पनि इरानसँगको बढ्दो तनावले नयाँ अनिश्चितता सिर्जना गरेको विश्लेषण गरिएको छ।
