सिन्धुली। अन्तरजातीय विवाह गरेका श्रीकृष्ण विकको सिन्धुलीको खुर्केटस्थित इलाका प्रहरी कार्यालयको हिरासतमा शंकास्पद मृत्यु भएपछि राष्ट्रिय स्वतन्त्र पार्टी रास्वपाकी सांसद रीमा विश्वकर्माले घटनाप्रति गम्भीर आपत्ति जनाएकी छन्।

उनले सामाजिक सञ्जाल फेसबुक मार्फत आपत्ति जनाएकी हुन्।

विश्वकर्माले लेखेकी छिन्, ‘एकातिर दलित समुदायसँग क्षमायाचना, अर्को तिर अन्तरजातीय विवाहसम्बन्धी उजुरीकै आडमा हिरासतभित्रै (दलित) नागरिकको शंकास्पद मृत्यु! न्याय देऊ सरकार।’

त्यस्तै, रास्वपाका सांसद खगेन्द्र सुनार, सोही क्षेत्रका सांसद आशिष गजुरेल र नेपाली कम्युनिस्ट पार्टी (नेकपा)का सांसद गणेश विक जिल्ला प्रशासन कार्यालय अगाडि अनिश्चितकालीन धर्नामा बसेका हुन्।

उनीहरूले घटनाको निष्पक्ष छानबिनका लागि संसदीय समिति गठनको माग गरेका छन्। तर, प्रधानमन्त्री बालेन शाहले हालसम्म कुनै चासो नदेखाएको उनीहरूको आरोप छ।

सांसद खगेन्द्र सुनारले सिन्धुलीका प्रमुख जिल्ला अधिकारी, जिल्ला प्रहरी प्रमुख र खुर्कोटका प्रहरी निरीक्षकलाई निलम्बन गर्न माग गरेका छन्।

गत ६ वैशाखमा सुनकोशी गाउँपालिका-३ का २२ वर्षीय श्रीकृष्ण विक इलाका प्रहरी कार्यालय खुर्कोटको हिरासतमा शौचालयमा झुण्डिएको अवस्थामा फेला परेका थिए। उपचारका क्रममा उनको मृत्यु भएको प्रहरीले जनाएको छ। तर, प्रहरीले आत्महत्या भने पनि मृतककी आमा विन्दामाया विकले हत्या भएको दाबी गरेकी छन्।

मृतकले केही महिनाअघि खोटाङकी १८ वर्षीया निर्जला मगरसँग अन्तरजातीय विवाह गरेका थिए र ललितपुरको सातदोबाटोमा बस्दै आएका थिए।