काठमाडौं । प्रधानमन्त्री बालेन्द्र शाहले काठमाडौँका खोला किनारमा रहेका सुकुम्बासी बस्तीहरूको व्यवस्थापन र सुरक्षित स्थानान्तरणबारे सरकार प्रतिबद्ध रहेको बताएका छन्।

वर्षेनि बाढीका कारण थापाथली, गैरीगाउँ, मनोहरा लगायत क्षेत्रका बासिन्दाले ज्यान जोगाउन सामान छोडेर भाग्नुपर्ने अवस्था दोहोरिँदै आएको उल्लेख गर्दै उनले यो दीर्घकालीन समस्या भएको बताएका छन्।

प्रधानमन्त्री शाहले अब यस समस्यालाई थाती नराखी सुरक्षित बसोबासको व्यवस्था गर्नुपर्ने आवश्यकता रहेको बताएका छन्। जोखिमपूर्ण क्षेत्रमा बसोबास गरिरहनु नागरिक अधिकार नभई सुरक्षित आवासमा बस्ने अधिकार सुनिश्चित हुनुपर्ने उनको भनाइ छ।

खोला किनारका बस्तीका कारण ढल निकास प्रणालीमा समस्या उत्पन्न भई उपत्यकाको वातावरण प्रभावित भएको उल्लेख गर्दै उनले स्थानान्तरणले ढल व्यवस्थापन र सरसफाइ सुधारमा समेत मद्दत पुग्ने बताएका छन्।

उनका अनुसार थापाथली, गैरीगाउँ, मनोहरा लगायत क्षेत्रका बासिन्दालाई मानवीय दृष्टिकोण अपनाउँदै बल प्रयोग नगरी सुरक्षित स्थानमा स्थानान्तरण गरिनेछ।

प्रधानमन्त्री शाहले आफ्नो निर्वाचन वाचा, पार्टीको वाचापत्र र सरकारको १०० बुँदे कार्यसूचीअनुसार सुकुम्बासी व्यवस्थापनलाई प्राथमिकतामा राखिएको बताए। उनले वास्तविक सुकुम्बासी र अतिक्रमणकारी छुट्याएर दीर्घकालीन समाधानतर्फ सरकार अघि बढ्ने स्पष्ट पारे।

देशभरका वास्तविक भूमिहीन परिवारका लागि कानुनी प्रक्रिया पूरा गरी जग्गा वितरणको तयारी भइरहेको उल्लेख गर्दै उनले यो समस्या वर्तमान सरकारले स्थायी रूपमा समाधान गर्ने दाबी गरेका छन्।

प्रधानमन्त्री शाहले ढुक्क रहन आग्रह गर्दै सरकार जिम्मेवार ढंगले समाधानतर्फ अघि बढिरहेको बताएका छन्।