एजेन्सी। इजरायल र लेबनानबीच युद्धविरामको अवधि थपिए पनि दुवै पक्षबीच तनाव र आक्रमण क्रम जारी रहेको छ। पछिल्लो घटनामा इजरायली हवाई आक्रमणका कारण दक्षिणी लेबनानमा कम्तीमा ६ जनाको मृत्यु भएको छ भने २ जना घाइते भएका छन्।

इजरायली रक्षा बलले दक्षिणी लेबनानका यातेर र कफरा क्षेत्रमा रहेको हिजबुल्लाहका रकेट प्रक्षेपण स्थललाई लक्षित गरी आक्रमण गरिएको जनाएको छ। ती स्थानहरू आफ्ना सेना र नागरिकका लागि सुरक्षा खतरा बनेको दाबी इजरायलले गरेको छ।

लेबनानको स्वास्थ्य मन्त्रालयका अनुसार आक्रमणमा ज्यान गुमाउनेको संख्या ६ पुगेको छ भने घाइते २ जनाको उपचार भइरहेको छ।

यसैबीच, हिजबुल्लाहले दक्षिणी लेबनानको रम्याह क्षेत्रमा इजरायली बख्तरबन्द सवारीलाई लक्षित गरी आक्रमण गरेको दाबी गरेको छ।

युद्धविराम औपचारिक रूपमा कायम रहे पनि दुवै पक्षबीचको सैन्य गतिविधि र तनाव अझै रोकिएको छैन, जसले क्षेत्रीय शान्तिमा अनिश्चितता कायम रहेको देखिएको छ।