काठमाडौं। सरकारले काठमाडौँको थापाथलीस्थित सुकुम्बासी बस्ती खाली गराएपछि त्यहाँका प्रभावितमध्ये हालसम्म १५ परिवारलाई दशरथ रंगशालास्थित अस्थायी ‘होल्डिङ सेन्टर’मा सारिएको छ।

उक्त स्थानमा काठमाडौँ उपत्यका विकास प्राधिकरण र अधिकारसम्पन्न एकीकृत बागमती सभ्यता विकास परियोजनाले छुट्टाछुट्टै रूपमा परिवारहरूको विवरण संकलन तथा अभिलेखिकरण गरिरहेका छन्। उनीहरूको बसोबास र खानपानको व्यवस्थापन काठमाडौँ महानगरपालिकाले गरिरहेको छ।

सहरी विकास मन्त्रालयकी उपसचिव कविता केसी बोगटीका अनुसार पहिले सबै परिवारको लगत संकलन गरी उनीहरूको देशभर कुनै जग्गा–जमिन छ कि छैन भन्ने यकिन गरिनेछ। त्यसपछि वैकल्पिक पुनःस्थापनाको व्यवस्था गरिने उनले जानकारी दिइन्। त्यतिन्जेलसम्म उनीहरूको बसोबास र खानपानको व्यवस्था रंगशालामै गरिनेछ।

होल्डिङ सेन्टरमा हाल रौतहटका मनीषा यादव र उनका दुई बालबालिका सहित विभिन्न जिल्लाका १५ परिवार रहेका छन्। उनीहरूमा दिनेश चेपाङ, इन्द्रबहादुर गुरुङ, बबिता बुढाथोकी, कृष्णबहादुर तामाङ, साउन्चा पोडे, अम्बिका दर्जी, पनिता थापा मगर, शिवकुमार चौधरी, कमल खपाङ्गी, मानबहादुर थिङ, गायत्रीमाया श्रेष्ठ, विनोद तामाङ, पुष्पा कसाई र रवानी अंसारीका परिवार समावेश छन्।

यीमध्ये केही परिवारलाई आवश्यक प्रक्रिया पूरा गर्नका लागि अस्थायी रूपमा होल्डिङ सेन्टरमा नै राखिएको जनाइएको छ।

यसैबीच, थापाथली बस्ती खाली गरिएसँगै डोजर र एक्स्काभेटर परिचालन गरी झुपडी तथा अन्य संरचना भत्काउने कार्य तीव्र बनाइएको छ। हालसम्म करिब ७० प्रतिशत संरचना भत्काइसकिएको काठमाडौँ महानगर प्रहरी प्रमुख विष्णुप्रसाद जोशीले जानकारी दिएका छन्।

सरकारले विस्थापित परिवारका लागि नागार्जुन, कीर्तिपुर, भक्तपुरको बोडे, खरीपाटी र चाँदबाग लगायतका स्थानमा अस्थायी होल्डिङ सेन्टरको व्यवस्था गरेको छ।