काठमाडौं । नेपाल स्टक एक्सचेन्ज (नेप्से) ले सिडिएस एण्ड क्लियरिङ लिमिटेड (सिडिएससी) की सञ्चालक प्रविण पन्दाकलाई सञ्चालक पदबाट फिर्ता बोलाउने निर्णय गरेको छ। नेप्से सञ्चालक समितिको वैशाख ११ गते बसेको बैठकले उक्त निर्णय गरेको हो।

निर्णयपछि नेप्सेले सिडिएससीलाई औपचारिक पत्रसमेत पठाइसकेको जनाएको छ। नेप्सेको तर्फबाट सिडिएससीमा प्रमुख कार्यकारी अधिकृत चूडामणि चापागाईं अध्यक्षका रूपमा रहेका छन् भने पन्दाक सञ्चालकका रूपमा कार्यरत थिइन्।

तर, पन्दाक २०८१ पुसमा नै सिडिएससीको प्रमुख कार्यकारी अधिकृत (सीईओ) पदमा चार वर्षका लागि नियुक्त भइसकेकी छन्। यही दोहोरो भूमिकाले संस्थाभित्र विवाद उत्पन्न भएको बताइएको छ।

विशेषगरी संस्थापक र सर्वसाधारण सेयरका लागि फरक–फरक अन्तर्राष्ट्रिय सेक्युरिटिज आइडेन्टिफिकेशन नम्बर (आईएसआईएन) लागू गर्ने विषयमा नेप्से र सिडिएससीबीच मतभेद बढेको थियो। पन्दाकले उक्त व्यवस्था अघि बढाउँदै धितोपत्र अभौतिकीकरण कार्य सञ्चालन निर्देशिका नेपाल धितोपत्र बोर्डमा पेश गरेकी थिइन्, तर हालसम्म स्वीकृति प्राप्त भएको छैन।

दुई फरक आईएसआईएन सम्बन्धी नीतिगत असहमति नै उनलाई फिर्ता बोलाउने प्रमुख कारण हुनसक्ने जानकारहरूको अनुमान छ।

यसबीच, नेप्सेको निर्णयपत्र बुझ्न अस्वीकार गरेकी पन्दाकले उक्त निर्णयलाई अनुचित भन्दै कानुनी प्रक्रिया अघि बढाउने चेतावनी दिएकी छन्। निर्णयसँगै सिडिएससीको नेतृत्व र नीतिगत दिशाबारे थप अन्योल देखिएको छ।