धनगढी । कैलाली प्रहरीले सञ्चालन गरेको स्वीप अपरेशनमा तीन दिनको अवधिमा १६९ जना पक्राउ परेका छन्। जिल्ला प्रहरी कार्यालय र मातहतका युनिटहरूले बुधबारदेखि शुक्रबारसम्म विभिन्न कसुरमा संलग्न व्यक्तिहरूलाई नियन्त्रणमा लिएका हुन्।

जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) योगेन्द्र तिमिल्सिनाका अनुसार अपरेशनका क्रममा लागुऔषध सेवन गर्ने ३९ जना र लागुऔषधसहित २३ जना पक्राउ परेका छन्।

प्रहरीले उनीहरूको साथबाट १७ ग्राम ३५० मिलिग्राम ब्राउन सुगर, १ ग्राम ३०० मिलिग्राम चरेश, १७७ ट्याब्लेट नाइट्राजेपाम, २०० थान ट्रामाडोल र १७ ग्राम गाँजा बरामद गरेको जनाएको छ।

त्यस्तै अदालतबाट सजाय तोकिएर फरार रहेका १० जना प्रतिवादी र चोरीमा संलग्न ४ जनालाई पनि पक्राउ गरिएको प्रहरीले जनाएको छ। लागुऔषधसहित पक्राउ परेकामाथि मुद्दा दर्ता गरी अनुसन्धान अघि बढाइएको छ।

प्रहरीका अनुसार पक्राउ परेकामध्ये ९३ जनालाई सम्झाइबुझाइ गरेर छाडिएको छ।