एजेन्सी। अमेरिकाको वासिङ्टन हिल्टनमा शनिबार राति आयोजित वार्षिक ‘ह्वाइट हाउस करेस्पोन्डेन्ट्स डिनर’का क्रममा सुरक्षा चेकपोइन्टमा भएको आक्रमणपछि ३१ वर्षीय कोल थोमस एलेन पक्राउ परेका छन्।

उनी क्यालिफोर्नियाको टोरेन्स निवासी रहेको र पेसाले शिक्षक भएको बताइएको छ। उनले सन् २०२४ मा ‘टिचर अफ द मन्थ’ अवार्ड प्राप्त गरेका थिए भने सन् २०१७ मा क्यालिफोर्निया इन्स्टिच्युट अफ टेक्नोलोजीबाट स्नातक गरेको विवरण सार्वजनिक गरिएको छ।

वासिङ्टन महानगरीय प्रहरीका अन्तरिम प्रमुख जेफ्री क्यारोलले पत्रकार सम्मेलनमार्फत प्रारम्भिक जानकारी सार्वजनिक गरेका छन्। प्रारम्भिक अनुसन्धान अनुसार, आक्रमणकारी सोही होटेलमा पाहुनाका रूपमा बसेको व्यक्ति भएको पुष्टि भएको छ। प्रहरीले उनको कोठा नियन्त्रणमा लिएर सिल गरेको छ र त्यहाँबाट सम्भावित प्रमाण तथा योजनासम्बन्धी सामग्री फेला पार्ने उद्देश्यले खानतलासी भइरहेको सीएनएनले जनाएको छ।

अधिकारीहरूका अनुसार, एलेनसँग सटगन, ह्यान्डगन तथा चक्कुहरू समेत रहेका थिए। उनले मुख्य सुरक्षा चेकपोइन्ट नजिकै सुरक्षाकर्मीमाथि गोली प्रहार गरेको बताइएको छ।

प्रहरीले घटनालाई एकल आक्रमणका रूपमा अनुसन्धान गरिरहेको छ। उनको कोठाबाट प्राप्त हुने प्रमाणहरूले उनको उद्देश्य तथा सम्भावित योजनाबारे थप स्पष्टता दिने अपेक्षा गरिएको छ।

घटनापछि उनलाई नियन्त्रणमा लिएर स्वास्थ्य परीक्षणका लागि अस्पतालमा राखिएको छ।

प्रत्यक्षदर्शीहरूका अनुसार, बन्दुकधारीले गोली चलाउन थालेपछि उपस्थित पाहुनाहरू टेबलमुनि लुकेका थिए। एक सेक्रेट सर्भिस एजेन्ट नजिकैबाट गोली लागे पनि बुलेट-प्रुफ ज्याकेटका कारण उनी जोगिएका छन् र हाल उपचाररत रहेको जनाइएको छ।

अमेरिकी महान्यायाधिवक्ता ज्यानिने पिरोका अनुसार, संदिग्धविरुद्ध आग्नेयास्त्र प्रयोग र संघीय अधिकारीमाथि आक्रमणसम्बन्धी मुद्दा दायर गर्ने तयारी भइरहेको छ।

घटनापछि राष्ट्रपति डोनाल्ड ट्रम्पले सुरक्षा निकायको प्रशंसा गर्दै आक्रमणकारीलाई ‘अत्यन्त अस्वस्थ मानसिकताका व्यक्ति’ बताएका छन्।