काठमाडौं । सुनको सिक्री लुटपाटमा संलग्न एक गिरोहका पाँच जनालाई प्रहरीले पक्राउ गरेको छ। पक्राउ पर्नेहरूमा नुवाकोटको ककनी नगरपालिका–३ का २१ वर्षीय सविन तामाङ, २६ वर्षीय विमल तामाङ, २१ वर्षीय सुजन तामाङ, विदुर नगरपालिका निवासी ४४ वर्षीय सतिस अमात्य र सोलुखुम्बुका १९ वर्षीय रितिका माझी रहेका छन्।

प्रहरीका अनुसार उक्त समूहले विभिन्न स्थानमा सिक्री थुत्ने घटनामा संलग्नता देखाएको छ। गत चैत १२ गते मातातीर्थस्थित फन पार्क नजिक हिँडिरहेकी एक महिलाको गलाबाट मोटरसाइकलमा आएका दुई जनाले सिक्री लुटेका थिए। त्यसैगरी चैत १९ गते नैकापमा ७० वर्षीया महिलाको सिक्री लुटिएको थियो भने वैशाख ६ गते चन्द्रागिरी क्षेत्रमा पनि यस्तै प्रकृतिको घटना भएको थियो।

यी सबै घटनामा संलग्न रहेको आशंकामा प्रहरीले उनीहरूलाई काठमाडौंको पैयुँटारबाट पक्राउ गरेको हो। पक्राउ गर्ने कार्य प्रहरी वृत्त थानकोटको टोलीले गरेको हो।

प्रहरीले उनीहरूको साथबाट १२.९० ग्राम सुनसहित ठूलो र सानो रेन्ची, खुकुरी र पेचकस समेत बरामद गरेको जनाएको छ। घटना सम्बन्धी थप अनुसन्धान जारी रहेको प्रहरीले जनाएको छ।