काठमाडौं । नेपाल राष्ट्र बैंकले बैंकिङ प्रणालीमा बढ्दो तरलता नियन्त्रण गर्न बुधबार ४० अर्ब रुपैयाँ निक्षेप संकलनमार्फत तान्ने निर्णय गरेको छ। यसका लागि आज दिउँसो ३ बजे बोलकबोल प्रक्रिया सञ्चालन हुने बैंकले जनाएको छ।

राष्ट्र बैंकका अनुसार ४९ दिनका लागि सञ्चालन हुने यस बोलकबोलमा न्यूनतम १० करोड रुपैयाँबाट बोल गर्न सकिनेछ। अधिकतम रकम पाँच करोडले भाग जाँदा आउने निःशेष भागसम्म सीमित रहने छ। सहभागी संस्थाले निक्षेप राख्न चाहेको कुल रकम र प्रस्तावित ब्याजदर (दशमलब पछाडि चार अंकसम्म) उल्लेख गर्नुपर्नेछ।

यस निक्षेपको सावाँ तथा ब्याज भुक्तानी असार ३ गते हुने व्यवस्था छ। ब्याजदर पनि बोलकबोलकै आधारमा निर्धारण हुनेछ।

निक्षेप संकलनका लागि गरिने बोलकबोल ब्याजदरमै आधारित हुनेछ र बहुब्याजदरमा बहुबोलकबोल गर्न सकिनेछ। यस प्रक्रियामा नेपाल राष्ट्र बैंकबाट इजाजतपत्र प्राप्त ‘क’, ‘ख’ र ‘ग’ वर्गका बैंक तथा वित्तीय संस्थाहरूलाई मात्र सहभागी हुन अनुमति दिइएको छ।