काठमाडौं। वैदेशिक रोजगारीमा आकर्षक तलबको प्रलोभन देखाउँदै विभिन्न देश पठाइदिने भन्दै रकम ठगी गरेको आरोपमा तीन जना पक्राउ परेका छन्।

केन्द्रीय प्रहरी समाचारकक्षका अनुसार दैलेखको नौमुले गाउँपालिका–८ की २९ वर्षीया ज्वालाकुमारी चन्द, कास्कीको पोखरा महानगरपालिका–१२ की ३९ वर्षीया भीमकुमारी गुरुङ र गोरखाको सिरानचोक गाउँपालिका–६ का ३७ वर्षीय भगवानराज ठकुरीलाई मंगलबार पक्राउ गरिएको हो।

अनुसन्धानअनुसार ज्वालाकुमारीले अजरबैजान पठाइदिने भन्दै एक पीडितबाट ३ लाख ३४ हजार रुपैयाँ ठगी गरेकी थिइन्। त्यसैगरी भीमकुमारीले हङकङ पठाइदिने प्रलोभनमा अर्का पीडितबाट ५ लाख रुपैयाँ लिएकी थिइन् भने भगवानराजले बेलायत पठाइदिने भन्दै १ लाख २० हजार रुपैयाँ ठगेको पाइएको छ।

पीडितहरूको उजुरीका आधारमा काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले उनीहरूलाई पक्राउ गरेको हो। पक्राउ परेकाहरूमाथि थप कारबाहीका लागि ताहाचलस्थित वैदेशिक रोजगार विभागमा पठाइएको प्रहरीले जनाएको छ।