काठमाडौं । प्रधानमन्त्री बालेन्द्र शाह नेतृत्वको नयाँ सरकार गठन भएपछि नेपालमा अमेरिकी उच्चस्तरीय प्रतिनिधिहरूको आवागमन उल्लेखनीय रूपमा बढेको छ।

पछिल्लो समय एकपछि अर्को अमेरिकी दूतको भ्रमणले नेपालप्रति वाशिङ्टनको चासो बढ्दो रूपमा देखिएको छ।

बिहीबार अमेरिकी राष्ट्रपति डोनाल्ड ट्रम्पका दक्षिण तथा मध्य एसियाका विशेष दूत सर्जियो गोर तीन दिने भ्रमणका लागि बिहीबार काठमाडौं आइपुग्दै छन्।

उनको भ्रमण अमेरिकी सहायक विदेशमन्त्री एस पावल कपुरले केही दिनअघि मात्र नेपाल भ्रमण सकेर फर्किएको झन्डै दुई साता नपुग्दै हुन लागेको हो।

यसअघि कपुरले नेपालमा रहँदा अर्थमन्त्री स्वर्णिम वाग्ले र परराष्ट्रमन्त्री शिशिर खनालसँग भेटवार्ता गरेका थिए भने द्विपक्षीय सहकार्य, आर्थिक लगानी र क्षेत्रीय स्थायित्वका विषयमा छलफल गरेका थिए। लगत्तै गोरको भ्रमण तय हुनु अमेरिकाले नेपालसँगको सम्बन्धलाई प्राथमिकतामा राखेको देखिएको छ।

गोरले पनि नेपालमा उच्चस्तरीय राजनीतिक भेटघाट गर्ने कार्यक्रम बनाएका छन्। प्रधानमन्त्री बालेन्द्र शाहसँग भेट गर्ने योजना भए पनि हालसम्म औपचारिक समय तय भइसकेको छैन। यद्यपि अर्थ र परराष्ट्र मन्त्रालयसँगको भेटघाट भने निश्चित भइसकेको बताइएको छ।

विशेषगरी नयाँ सरकार गठनपछि अमेरिकी पक्षबाट लगातार उच्चस्तरीय प्रतिनिधि आउनु नेपाललाई दक्षिण एसियाली भू-राजनीतिमा महत्वपूर्ण साझेदारका रूपमा हेरिएको संकेत मानिएको छ।

विश्लेषकहरूका अनुसार चीन र भारतबीचको प्रतिस्पर्धात्मक प्रभावबीच अमेरिका पनि आफ्नो उपस्थिति मजबुत बनाउन सक्रिय देखिएको छ।

यही सन्दर्भमा अमेरिकी प्रतिनिधिहरूको ‘लर्को’ लाग्नु केवल औपचारिक भ्रमण मात्र नभई रणनीतिक रुचि, आर्थिक सहकार्य र राजनीतिक सम्बन्ध विस्तारको संकेत भएको जानकारहरू बताउँछन्। आगामी दिनमा यस्ता उच्चस्तरीय भ्रमणहरू अझ बढ्न सक्ने अनुमान गरिएको छ।