काठमाडौं । आज पनि सुनचाँदीको मूल्यमा गिरावटै देखिएको छ। विगत तीन दिनदेखि दुवै धातुको भाउ लगातार ओरालो लागिरहेको छ। नेपाल सुनचाँदी व्यवसायी महासंघका अनुसार आज सुनको मूल्य तोलामा १,८०० रुपैयाँले घटेर २,९२,७०० रुपैयाँ पुगेको छ।

हिजो मात्र सुनको भाउ तोलामा ३,००० रुपैयाँले घटेर २,९४,५०० रुपैयाँमा झरेको थियो। त्यसभन्दा अघिल्लो मंगलबार पनि तोलाको ३,००० रुपैयाँले नै मुल्य घटेको थियो। यसरी हेर्दा तीन दिनमै सुनको मूल्य ७,८०० रुपैयाँले कम भइसकेको छ।

यसअघि आइतबार सुनको मूल्य तोलामा २,७०० रुपैयाँले बढेको र सोमबार १,३०० रुपैयाँले थपिएको थियो। तर गत साताको बुधबार, बिहीबार र शुक्रबार पनि लगातार मूल्य घटेको थियो—शुक्रबार २,२००, बिहीबार १,८०० र बुधबार ८०० रुपैयाँले सुनको भाउ घटेको थियो।

यस्तै, आज चाँदीको मूल्य पनि तोलामा १०५ रुपैयाँले घटेर ४,८१० रुपैयाँमा पुगेको छ।

गएको माघ १५ गते एकैदिन तोलामा २०,५०० रुपैयाँले बढेर सुनको मूल्य ३,३९,३०० रुपैयाँ पुगेको थियो, जुन नेपाली बजारमा अहिलेसम्मकै उच्च दर हो। सोही समय, माघ १८ गते, चाँदीको मूल्य भने तोलामा १,५६५ रुपैयाँले घटेको थियो, जसलाई हालसम्मकै सबैभन्दा ठूलो दैनिक गिरावट मानिन्छ।

माघ १५ कै दिन चाँदीको मूल्य ७,५०५ रुपैयाँ पुगेको थियो, जुन चाँदीको अहिलेसम्मकै उच्च मूल्य हो।