रविको मुद्दा फिर्ताविरुद्धको रिटको आज सुनुवाइ हुँदै
Nepal One HD १७ वैशाख २०८३ ११:५७
काठमाडौं। राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्धको मुद्दा संशोधन गर्ने निर्णयविरुद्ध सर्वोच्च अदालतमा दायर रिटको सुनुवाइ आज (बिहीबार) पूर्ण इजलासमा हुने भएको छ।
सर्वोच्च अदालतका न्यायाधीशहरू अब्दुल अजिज मुसलमान, श्रीकान्त पौडेल र शान्तिसिंह थापाको पूर्ण इजलासमा उक्त रिटको सुनुवाइका लागि पेसी तोकिएको हो।
यसअघि गत चैत १५ गते न्यायाधीशहरू विनोद शर्मा र अब्दुल अजिज मुसलमानको संयुक्त इजलासले उक्त मुद्दा पूर्ण इजलासमा पठाउन आदेश दिएको थियो।
निवर्तमान महान्यायाधिवक्ता सविता भण्डारी बरालले रवि लामिछानेविरुद्धको सम्पत्ति शुद्धीकरण र संगठित अपराधसम्बन्धी मुद्दा फिर्ता गर्ने निर्णय गरेकी थिइन्।
उक्त निर्णय बदर गर्न माग गर्दै युवराज सफल, वरिष्ठ अधिवक्ता दिनेश त्रिपाठी र अधिवक्ता आभास रेग्मीले सर्वोच्च अदालतमा रिट दायर गरेका हुन्।
