काठमाडौं। वैदेशिक रोजगारीका लागि स्लोभाकिया पठाउने भन्दै रकम ठगी गरेको आरोपमा एक जनालाई प्रहरीले पक्राउ गरेको छ।

राम्रो देश, राम्रो काम र आकर्षक तलबको प्रलोभन देखाएर ठगी गरेको आरोपमा ४५ वर्षीय हिमहरी अर्याललाई पक्राउ गरिएको प्रहरीले जनाएको छ। उनले ३ लाख ७५ हजार रुपैयाँ ठगी गरेको आरोप छ।

पाल्पाको रैनादेवी गाउँपालिका–६ घर भएका अर्याललाई काठमाडौँ उपत्यका अपराध अनुसन्धान कार्यालयबाट खटिएको प्रहरी टोलीले काठमाडौँ महानगरपालिका-११ बाट पक्राउ गरेको हो।

प्रहरीका अनुसार उनले ५ जनासँग रकम लिएर विदेश पठाउने भन्दै आश्वासन दिएका थिए। तर रकम लिएपछि सम्पर्कविहीन भएको भन्दै पीडितहरूले उजुरी दिएका थिए।

उजुरीका आधारमा अनुसन्धान अघि बढाउँदै उनलाई पक्राउ गरिएको प्रहरीले जनाएको छ। हाल उनलाई थप अनुसन्धान तथा आवश्यक कारबाहीका लागि वैदेशिक रोजगार विभागमा पठाइएको छ।