काठमाडौं। नियमित गस्तीमा रहेको प्रहरी टोलीले देशका विभिन्न भागबाट लागुऔषधसहित १८ जनालाई पक्राउ गरेको छ।

केन्द्रीय प्रहरी समाचार कक्षका अनुसार झापाको अर्जुनधारा नगरपालिका-११ चियाबगानबाट खैरो हेरोइनसहित ५ जना पक्राउ परेका छन्। त्यस्तै फिदिम नगरपालिका-१ शनि क्षेत्रबाट २ जना, सुनसरीको कोशी गाउँपालिका-१ लौकहीबाट ३ जना, धरान उपमहानगरपालिका-११ बाट १ जना र मध्यपुरथिमि नगरपालिका-१ मनोहराबाट २ जना पक्राउ गरिएको हो।

प्रहरीका अनुसार पक्राउ परेकामध्ये केही व्यक्तिबाट चिकित्सकको सिफारिसमा मात्र खरिद गर्न पाइने औषधि तथा लागुऔषध तौल गर्न प्रयोग हुने डिजिटल तराजु समेत बरामद गरिएको छ।

यसैगरी कोहलपुर नगरपालिका-१० चडिण्डा टोलबाट १ जना, पोखरा महानगरपालिका-२५ याम्दीबाट १ जना र सिम्रौगढ नगरपालिका-३ भट्टीवैरियाबाट २ जना तथा नेपालगन्ज उपमहानगरपालिका-१३ लालापुरबाट १ जना पक्राउ परेका छन्।

प्रहरीका अनुसार उनीहरूलाई बुधबार विभिन्न स्थानबाट पक्राउ गरिएको हो। थप अनुसन्धान जारी रहेको प्रहरीले जनाएको छ।