काठमाडौं। अमेरिकी राष्ट्रपति डोनाल्ड ट्रम्पका दक्षिण तथा मध्य एसिया हेर्ने विशेष दूत सर्जियो गोर आज साँझ काठमाडौं आइपुग्ने भएका छन्।

नयाँ सरकार गठनपछि अमेरिकाबाट हुने यो दोस्रो उच्चस्तरीय भ्रमण हो। यसअघि ७ वैशाखमा अमेरिकी सहायक विदेशमन्त्री समिर पल कपुर नेपाल आएका थिए।

१० दिनमै लगातार दुई उच्चस्तरीय अमेरिकी भ्रमण हुनुले नेपाल-अमेरिका सम्बन्धलाई वाशिङ्टनले प्राथमिकतामा राखेको भन्दै कूटनीतिक वृत्तमा चर्चा भइरहेको छ।

भ्रमणका क्रममा सर्जियो गोरले रास्वपा सभापति रवि लामिछाने, अर्थमन्त्री डा. स्वर्णिम वाग्ले र परराष्ट्रमन्त्री शिशिर खनालसँग भेट गर्ने कार्यक्रम तय भएको छ। तर प्रधानमन्त्री बालेन्द्र शाहसँग भने भेटवार्ता तय नभएको बताइएको छ।

स्रोतका अनुसार प्रधानमन्त्रीसँग भेटका लागि पहल भए पनि कार्यव्यस्तताका कारण समय मिल्न नसकेको हो। यसअघि आएका अमेरिकी अधिकारीहरूले पनि प्रधानमन्त्रीसँग भेट गर्न नपाएको उल्लेख गरिएको छ।

नयाँ सरकार आएपछि कूटनीतिक भेटघाटको शैली पुनर्संरचना गरिएको र प्रधानमन्त्रीले नीति-स्तरका विषयबाहेकका भेटलाई परराष्ट्र मन्त्रालयमै केन्द्रित गरिरहेको बताइएको छ।