काठमाडौं। काठमाडौंको बल्खुमा शुक्रबार खाली गरिएको सुकुम्बासी बस्ती नजिकै बागमती खोलामा एक व्यक्ति मृत अवस्थामा फेला परेका छन्।

प्रहरीका अनुसार अन्दाजी ५५ देखि ६० वर्ष उमेरका पुरुषको शव दिउँसो भेटिएको हो।

मृतक खोटाङ घर भई बल्खु क्षेत्रमा बस्दै आएका इन्द्रबहादुर राई रहेको बताइएको छ। परिवारका अनुसार उनी बिहान घर भत्किएको दृश्य हेर्न नसक्ने भन्दै एक्लै बाहिरिएका थिए।

श्रीमती सरिता राईले बिहान घरबाट ‘हेर्न सक्दिनँ’ भन्दै बर्बराउँदै निस्किएका श्रीमान् दिउँसो मृत अवस्थामा फेला परेको बताएकी छन्। उनी अहिले घटनास्थलमै छन्।

जिल्ला प्रहरी परिसर काठमाडौंका प्रवक्ता प्रहरी उपरीक्षक (एसपी) पवनकुमार भट्टराईका अनुसार इन्द्रबहादुरको परिवार पनि बल्खुको सुकुम्बासी बस्तीमा बस्दै आएको भए पनि उनी परिवारको नियमित सम्पर्कमा नरहने र कहिले कता, कहिले कता बस्ने गरेको प्रारम्भिक बुझाइ छ।

उनका अनुसार, ‘परिवार बल्खुको सुकुम्बासी बस्तीमा बस्ने रहेछ। उहाँ (इन्द्रबहादुर) भने परिवारको सम्पर्कमा नियमित नहुने भन्ने बुझिएको छ। बसोबासको ठेगाना पनि स्पष्ट छैन भन्ने सुनेका छौँ। बाँकी विस्तृत बुझ्ने काम भइरहेको छ।’

यता, मृतककी श्रीमती सरिताले भने उनी बिहानै घरबाट निस्किएको बताएकी छन्। उनले भनिन्, ‘बिहान घर भत्किएपछि एक्लै बर्बराउँदै हेर्न सक्दिनँ भनेर निस्किनुभएको थियो, अहिले यस्तो अवस्थामा भेटिनुभयो।’

पत्नी सरिता र उनका छोरा अहिले घटनास्थलमै छन्। स्थानीयका अनुसार इन्द्रबहादुरको परिवार लामो समयदेखि बल्खुस्थित सुकुम्बासी बस्तीमा बस्दै आएको थियो।