एजेन्सी। अमेरिकाका राष्ट्रपति डोनल्ड ट्रम्पले स्कटल्यान्ड र अमेरिकी राज्य केन्टकीबीचको ह्विस्की तथा बर्बन व्यापारमा लगाइएका भन्सार शुल्क र प्रतिबन्धहरू हटाउने घोषणा गरेका छन्।

ट्रम्पले ट्रुथ सोसलमा पोस्ट गर्दै यो निर्णय बेलायतका राजा चार्ल्स र रानी क्यामिलाको हालैको ह्वाइट हाउस भ्रमणको सम्मानमा गरिएको बताएका छन्। उनले स्कटल्यान्ड र केन्टकी दुवैका लागि ह्विस्की र बर्बन उद्योग अत्यन्त महत्वपूर्ण रहेको उल्लेख गरेका छन्।

उनका अनुसार, यो निर्णयले दुई क्षेत्रबीच लामो समयदेखि रहेको व्यापारिक सम्बन्धलाई अझ सुदृढ बनाउनेछ, विशेषगरी उत्पादनमा प्रयोग हुने काठका पिपाहरूको आदानप्रदानलाई सहज बनाउने उद्देश्य रहेको छ।

ट्रम्पले पोस्टमा शाही भ्रमणले आफूलाई यस्तो निर्णय गर्न प्रेरित गरेको संकेतसमेत गरेका छन्। उनले यो कदमलाई अमेरिका–बेलायत व्यापार सम्बन्ध सुदृढ गर्ने दिशामा महत्वपूर्ण भएको बताएका छन्।

यसअघि सन् २०२५ मा ट्रम्प प्रशासनले बेलायती सामानमा १० प्रतिशत आधारभूत भन्सार शुल्क लागू गरेको थियो, जसले स्कच ह्विस्की उद्योगमा चिन्ता बढाएको थियो। उक्त उद्योग ठूलो मात्रामा अमेरिकी बजारमा निर्भर रहेको छ।

व्यापार प्रतिनिधिहरूले भन्सार शुल्कले मदिरा उद्योगमा दबाब बढाउने चेतावनी दिँदै आएका थिए।

पछिल्लो निर्णयपछि ह्विस्की उद्योगले राहतको महसुस गर्ने अपेक्षा गरिएको छ। उद्योग प्रतिनिधिहरूका अनुसार यो कदमले हालको आर्थिक दबाबबीच उत्पादकहरूलाई केही सहजता प्रदान गर्नेछ।