काठमाडौं । नेकपा एमालेका महासचिव शंकर पोखरेलले प्रधानमन्त्री बालेन शाहसँग विस्थापित सुकुम्वासीहरूको दीर्घ समाधानका लागि ‘ज्ञ-क्रान्ति’ को स्पष्ट खाका सार्वजनिक गर्न माग गरेका छन्। सुकुम्वासी बस्तीमा डोजर चलाउँदै सरकारले मानवता, मानवीय दायित्व र दिगो व्यवस्थापनप्रति गम्भीर नदेखिएको भन्दै उनले सरकारको कठोर आलोचना गरेका छन्।

पोखरेलले प्रश्न गरेका छन्, ‘वास्तविक क्रान्ति त ज्ञानबाट सुरु हुन्छ भन्ने प्रधानमन्त्रीकै भनाइ हो। तर आजको अवस्थामा प्रधानमन्त्रीले कस्तो क्रान्तिकारी कदम चालेका छन्? त्रास, अन्योल र असुरक्षा महसुस गरिरहेका सुकुम्वासी नागरिकलाई स्पष्ट योजना र समयमै आश्वासन दिनु पर्दैन र?’

उनका अनुसार सरकारले जनतालाई प्राथमिकता नदिएको प्रमाण यही घटनाले पुनः देखाएको छ। उनले २०७५ साल बारा-पर्साको भीषण आँधीको उदाहरण दिँदै त्यतिबेला सरकारले छोटो समयमा आवास निर्माण गरेर प्रभावितलाई पुनःस्थापित गरेको सकारात्मक दृष्टान्त सम्झाए। ‘त्यो बेला राज्यले जिम्मेवारी बुझेको थियो,’ पोखरेलले भने।

तर अहिलेको अवस्थालाई उनले त्यसको ठ्याक्कै विपरीत चित्रित गरे। ‘सरकारले आफैं डोजर चलाएर हजारौं नागरिकलाई घरवारविहीन बनाएको छ,’ उनले भने, ‘बर्खा सुरु हुनु अघि पुनःस्थापना नहुने हो भने ठूलो मानवीय संकट अवश्यै निम्तिन्छ।’
अस्थायी सेल्टरको दयनीय अवस्था र त्यहाँ पुग्नेहरूलाई फोटो खिच्नसमेत रोक लगाइएको तथ्यले सरकारको असंवेदनशीलता झनै स्पष्ट भएको पोखरेलको टिप्पणी छ।