काठमाडौं। काठमाडौँका विभिन्न सुकुम्बासी बस्तीमा सरकारद्वारा डोजर चलाएर संरचना हटाउने अभियानप्रति युवाहरूले कडा आपत्ति जनाएका छन्।

जेनजी मुभमेन्ट नेपालले विज्ञप्ति जारी गर्दै प्रधानमन्त्री बालेन्द्र साहमाथि आत्महत्या दुरुत्साहनको आरोपमा कानुनी कारबाहीको माग गरेको छ।

विज्ञप्तिमा थापाथली, मनोहरा, सिनामंगल र बल्खु क्षेत्रमा भएको डोजर कारबाहीका कारण दुई जनाले आत्महत्या गरेको दाबी गर्दै यसलाई ‘राज्य आतंकको परिणाम’ भनिएको छ। साथै प्रभावित परिवारका लागि सुरक्षित र सम्मानजनक वैकल्पिक आवासको व्यवस्था गर्न पनि माग गरिएको छ।

त्यसैगरी, जेनजी फ्रन्टले पनि सरकारको कदमलाई अमानवीय र असंवैधानिक भन्दै विरोध जनाएको छ।

वक्तव्यमा यस्ता गतिविधि नरोके नागरिक सर्वोच्चताको बलमा सरकार परिवर्तन हुन सक्ने चेतावनीसमेत दिइएको छ।