धनगढी। बझाङमा नक्कली ‘खुकुरी’ ब्रान्डका चुरोटसहित दुई जना पक्राउ परेका छन्।

जयपृथ्वी नगरपालिका-१० को जिपपार्क क्षेत्रमा नियमित जाँचका क्रममा उनीहरूलाई पक्राउ गरिएको प्रहरीले जनाएको छ।

जिल्ला प्रहरी कार्यालय बझाङका प्रहरी निरीक्षक दीपक बिष्टका अनुसार पक्राउ पर्नेमा कञ्चनपुर शुक्लाफाँटा नगरपालिका-९ का ३२ वर्षीय पंकज चौधरी र बैतडी पाटन नगरपालिका-२ का २१ वर्षीय हेमराज पाण्डेय छन्।

चौधरीले चलाएको सु.प.प्र. ००१ क २५५२ नम्बरको मिनी ट्रकबाट ९ पेटी र १० डण्डा नक्कली खुकुरी चुरोट बरामद गरिएको बिष्टले जानकारी दिए। गोप्य सूचनाका आधारमा खटिएको प्रहरी टोलीले ट्रक जाँच गर्दा चुरोट फेला परेको हो।

बरामद चुरोटसहित चालक चौधरी र रिटेल व्यवसायमा संलग्न पाण्डेयलाई नियन्त्रणमा लिएर थप अनुसन्धान जारी रहेको प्रहरीले जनाएको छ।

प्रहरी निरीक्षक बिष्टका अनुसार यो आन्तरिक राजस्वसम्बन्धी मुद्दा भएकाले आवश्यक कारबाहीका लागि दस्ती सम्बन्धित निकायमा पठाइने छ।