एजेन्सी। इरानले युद्ध अन्त्यका लागि अघि सारेको १४ बुँदे प्रस्तावमा संयुक्त राज्य अमेरिकाले औपचारिक प्रतिक्रिया पठाएको जनाएको छ। इरानको विदेश मन्त्रालयका प्रवक्ता एस्माइल बाघेईले सरकारी टेलिभिजनसँग कुरा गर्दै उक्त प्रतिक्रिया प्राप्त भइसकेको र हाल त्यसको विस्तृत अध्ययन भइरहेको जानकारी दिएका छन्।

उनका अनुसार इरानको प्रस्तावको मुख्य उद्देश्य क्षेत्रीय युद्ध रोक्नु र तनाव कम गर्नु हो। यसमा आणविक कार्यक्रमसँग सम्बन्धित प्राविधिक विषयहरू समावेश नगरिएको उनले स्पष्ट पारे।

बाघेईले अहिलेको चरणमा प्राथमिकता युद्धविराम र क्षेत्रीय स्थायित्वमा केन्द्रित रहेको बताए। विशेषगरी लेबनानलगायत क्षेत्रमा देखिएको तनाव समाधान गर्ने विषयलाई पनि छलफलको हिस्साका रूपमा लिइएको उनको भनाइ छ।

यसैबीच, इरानका विदेशमन्त्री सैयद अब्बास अरागचीले ओमान र जर्मनीका समकक्षीसँग छुट्टाछुट्टै टेलिफोन संवाद गरेका छन्। ती वार्तामा पछिल्लो क्षेत्रीय अवस्था र कूटनीतिक प्रयासमार्फत तनाव घटाउने सम्भावनाबारे छलफल भएको इरानी विदेश मन्त्रालयले जनाएको छ।

पछिल्लो समय इजरायल र अमेरिकाले इरानका केही सहरहरूमा संयुक्त सैन्य कारबाही गरेको र त्यसको जवाफमा इरानले पनि ड्रोन तथा क्षेप्यास्त्र आक्रमण गरेको बताइन्छ, जसले क्षेत्रीय तनाव बढाएको छ।

यद्यपि त्यसपछि अस्थायी युद्धविराम लागू भए पनि दीर्घकालीन समाधानका लागि भएका वार्ताहरूले अझै ठोस नतिजा दिन सकेका छैनन्। हालको अवस्था कूटनीतिक प्रयासका लागि संवेदनशील र निर्णायक चरणमा रहेको देखिन्छ।