काठमाडौं। काठमाडौं महानगरपालिका-२६ पवित्रनगरबाट नियन्त्रित लागूऔषध ट्रामाडोल २२० ट्याब्लेटसहित ३ जनालाई प्रहरीले पक्राउ गरेको छ । पक्राउ पर्नेहरूमा काठमाडौं नयाँ बसपार्क बस्ने झापा घर भएका ३३ वर्षीय सबिन बस्नेत, काठमाडौं सामाखुशी बस्ने मोरङ घर भएका २१ वर्षीय आयुष लिम्बु र काठमाडौं पवित्रनगर बस्ने दोलखा घर भएका १८ वर्षीय किशोर रहेका छन् । प्रहरी प्रभाग गोंगबुबाट खटिएको टोलीले उनीहरूलाई उक्त लागूऔषधसहित पक्राउ गरेको हो ।

यसैगरी काठमाडौं कीर्तिपुर नगरपालिका-१० बाट ट्रामाडोल १४० ट्याब्लेट, नाइट्राभेट २ ट्याब्लेट र नगद १,४०० रुपैयाँसहित सोही ठाउँ चिलन्चो बस्ने २९ वर्षीय योगेन्द्र महर्जन सहित २ जनालाई आइतबार दिउँसो प्रहरीले पक्राउ गरेको छ । उनीहरूलाई प्रहरी चौकी कीर्तिपुरले नियन्त्रणमा लिएको हो ।

बाराको जीतपुरसिमरा-१ पथलैया चोकबाट करिब २१ किलो गाँजासहित मकवानपुर घर भएका १७ वर्षीय किशोरसहित २ जनालाई आइतबार राति पक्राउ गरिएको छ । हेटौँडाबाट पथलैयातर्फ आउँदै गरेको स्कुटर जाँचका क्रममा उनीहरू पक्राउ परेका हुन् ।

पाल्पाको तानसेन नगरपालिका-९ अम्लिहानबाट ब्राउनसुगर जस्तो देखिने पदार्थ २९० मिलिग्राम र नगद ११,६१० रुपैयाँसहित माथागढी गाउँपालिका-३ का ३३ वर्षीय प्रेमबहादुर राना र २६ वर्षीय आशिष राना पक्राउ परेका छन् ।

तनहुँको आँबुखैरेनी गाउँपालिका-४ बेनीटारबाट डाइजेपाम, बुप्रेनोर्फिन र फेनारगन एम्पुलसहित लमजुङ राइनास नगरपालिका–९ का २९ वर्षीय सुमन तामाङ पक्राउ परेका छन् । उनलाई काठमाडौंबाट पोखरातर्फ जाँदै गरेको माइक्रोमा फेला पारिएको हो ।

कञ्चनपुरको बेलौरी नगरपालिका-६ खैरेनाबाट खैरो हेरोइन जस्तो देखिने पदार्थसहित २२ वर्षीय शिवकुमार राना पक्राउ परेका छन् । त्यस्तै बेलडाँडी नगरपालिका–५ झिलमिलाबाट ब्राउनसुगरसहित २९ वर्षीय रामबहादुर कठायत र ३३ वर्षीय हर्कबहादुर बुढा पक्राउ परेका छन् ।

कैलालीको टीकापुर नगरपालिका–७ खैरीपुरबाट खैरो हेरोइनसहित ३२ वर्षीय श्यामबहादुर चौधरी र २५ वर्षीय भानु गिरी पक्राउ परेका छन् । त्यस्तै धनगढी उपमहानगरपालिका–८ भगत चोकबाट ब्राउनसुगरसहित ४० वर्षीय राजाराम चौधरी र २४ वर्षीय शंकर चौधरी पक्राउ परेका छन् ।

मोरङ सुन्दरहरैँचा नगरपालिका-८ बाट करिब २ किलो ५ सय ग्राम गाँजासहित ८० वर्षीय चन्द्रबहादुर बिष्ट पक्राउ परेका छन् । घर तलासीका क्रममा गाँजा फेला परेको प्रहरीले जनाएको छ ।

सुनसरी इटहरी उपमहानगरपालिका-१७ पकलीबाट ब्राउनसुगरसहित २६ वर्षीय प्रकाश भुजेल पक्राउ परेका छन् ।

सिराहा धनगढीमाई नगरपालिका-५ तेतिस विगहाबाट खैरो हेरोइन ८ ग्राम र डिजिटल तराजुसहित २० वर्षीय भरत कुमार मण्डल र २१ वर्षीय जिवछ साफी पक्राउ परेका छन् । उनीहरूले प्रयोग गरेको मोटरसाइकल समेत प्रहरीले बरामद गरेको छ ।

प्रहरीका अनुसार पक्राउ परेकाहरूमाथि लागूऔषध सम्बन्धी कानुनी कारबाही अघि बढाइएको छ र थप अनुसन्धान भइरहेको छ।