काठमाडौं । राष्ट्रिय आविष्कार केन्द्रका संस्थापक तथा सांसद महावीर पुनले वर्तमान सरकारले विज्ञान, प्रविधि र नवप्रवर्तन क्षेत्रलाई उपेक्षा गर्न खोजेको भन्दै कडा असन्तुष्टि जनाएका छन्।

पूर्व शिक्षामन्त्रीसमेत रहेका पुनले विज्ञान तथा प्रविधि मन्त्रालयको अस्तित्व नै कमजोर पार्ने र नवप्रवर्तनलाई उद्योग मन्त्रालयअन्तर्गत सीमित गर्ने प्रयास भइरहेको आरोप लगाएका हुन्।

सोमबार सामाजिक सञ्जाल फेसबुकमार्फत धारणा सार्वजनिक गर्दै उनले सरकारको कार्यशैलीप्रति आपत्ति जनाएका हुन्।

उनले लेखेका छन्, ‘सामाजिक सञ्जाल हेर्दा अहिलेको सरकारले विज्ञान, प्रविधि, अनुसन्धान र नवप्रवर्तनमा गम्भीरता देखाउने संकेत देखिँदैन। बरु नवप्रवर्तनलाई उद्योग मन्त्रालयमा सीमित गर्ने र विज्ञान तथा प्रविधि मन्त्रालय नै कमजोर बनाउने प्रयास भइरहेको जस्तो लाग्छ।’

पुनका अनुसार नवप्रवर्तन कुनै एक मन्त्रालय वा क्षेत्रभित्र मात्र सीमित हुने विषय होइन। उनका अनुसार यो राजनीति, प्रशासन, सुशासन, स्वास्थ्य, कृषि, शिक्षा, व्यापारदेखि विज्ञान, प्रविधि, जीवन विज्ञान, कला र साहित्यसम्म सबै क्षेत्रमा फैलिने बहुआयामिक प्रक्रिया हो।

उनले सरकारलाई विज्ञान र अनुसन्धानलाई प्राथमिकता दिन र मन्त्रालय गाभ्ने वा कमजोर बनाउने खालका निर्णय नगर्न चेतावनीसमेत दिएका छन्। व्यंग्यात्मक शैलीमा उनले लेखेका छन्, ‘मेरो टाउको फोड्नु नपरोस् है सरकारका साथीहरू।’

पुनले लामो समयदेखि कुल गार्हस्थ्य उत्पादन (जीडीपी) को कम्तीमा १ प्रतिशत बजेट अनुसन्धान र नवप्रवर्तन क्षेत्रमा छुट्याउनुपर्ने माग गर्दै आएका छन्। उनका अनुसार देशको दीर्घकालीन विकासका लागि विज्ञान-प्रविधिमा लगानी अपरिहार्य छ।