राष्ट्रिय स्वतन्त्र पार्टी (रास्वपा) ले सहकारी ठगी, मिटरब्याजी तथा अवैध आर्थिक गतिविधिमा संलग्न व्यक्तिलाई स्थानीय तहको निर्वाचनमा उम्मेदवार नबनाउने नीति सार्वजनिक गरेको छ। स्थानीय तहका उम्मेदवार छनोटका लागि जारी गरिएको नयाँ रुपरेखामा यो व्यवस्था गरिएको हो ।

रुपरेखामा उम्मेदवारहरूले मिटरब्याजी, सट्टेबाजी, हप्ताअसुली, ढुकुटी, हुण्डी कारोबार वा सहकारी संस्थाको बचत अपचलन जस्ता कुनै पनि गैरकानुनी वा अनौपचारिक आर्थिक क्रियाकलापमा प्रत्यक्ष वा परोक्ष संलग्न नरहेको स्वघोषणा गर्नुपर्ने उल्लेख छ।

स्थानिय तहका उम्मेदवारका लागि यो नियम बनाइरहदा पार्टीका सभापति रवि लामिछानेमाथि नै सहकारी ठगी र सम्पत्ति शुद्धिकरणसम्बन्धी मुद्दा विभिन्न जिल्लामा विचाराधीन छन्। कास्की, चितवन, पर्सा, काठमाडौँ र रुपन्देहीमा उनीविरुद्ध उजुरी दर्ता छन्। तल्लो तहका उम्मेदवारमा कडा मापदण्ड बनाउने रास्वपाले आफ्नै नेतृत्वको मुद्दा भने बेवास्ता गरेको छ।

स्थानीय तहको उम्मेदवार बन्न क्यान्डिडेट क्लबमा तोकिएका संवैधानिक तथा कानुनी योग्यता अनिवार्य छन्। उम्मेदवार २१ वर्ष उमेर पूरा भएको र सम्बन्धित पालिकाको मतदाता नामावलीमा नाम दर्ता भएको हुनुपर्नेछ।

पार्टीले तोकेको अतिरिक्त योग्यता अनुसार उम्मेदवारले सुशासन, पारदर्शिता र नागरिक उत्तरदायित्वको मूल मर्मप्रति पूर्ण प्रतिबद्धता जनाउनुपर्नेछ। साथै, पार्टीको विधान, प्रस्तावना तथा मूल्य मान्यताप्रति स्पष्ट आस्था राख्नु पर्ने उल्लेख छ।

उम्मेदवारले अन्य कुनै दलको सदस्यता राखेको भए त्यसलाई विधिवत् त्याग गरिसकेको हुनुपर्नेछ। साथै, कार्यसम्पादन मूल्यांकन प्रणाली स्वीकार गर्ने र छनोट प्रक्रियामा पूर्ण रूपमा सहभागी हुने प्रतिवद्धता समेत आवश्यक छ।

पार्टी विधानअनुसार उम्मेदवारले माग गरिएका सबै कागजात अद्यावधिक सम्पत्ति विवरण, प्रहरी चरित्र प्रमाणपत्र आदि पेश गर्न मञ्जुर हुनुपर्नेछ। यसैमा उम्मेदवारको सबै शैक्षिक प्रमाणपत्र सक्कली रहेको र प्रमाणीकरण गर्दा प्रमाणित हुने स्वघोषणा पनि जोडिएको छ।

वैवाहिक अवस्थासम्बन्धी स्पष्टता पनि अनिवार्य गरिएको छ। उम्मेदवारले आफ्नो पारिवारिक तथा वैवाहिक स्थिति कानुनसम्मत र विवादरहित रहेको स्वघोषणा गर्नुपर्नेछ।

दुर्व्यवहार तथा डिजिटल अपराधसम्बन्धी मापदण्डमा, उम्मेदवार कुनै पनि प्रकारको घरेलु हिंसा, यौन दुर्व्यवहार, सार्वजनिक स्थलमा अमर्यादित व्यवहार वा साइबर बुलिइङ, अनलाइन ठगी जस्ता गतिविधिमा संलग्न नभएको घोषणा गर्नुपर्नेछ।

वित्तीय र आर्थिक शुद्धताको भागमा, उम्मेदवारले मिटरब्याज, हुण्डी, सट्टेबाजी, ढुकुटी वा सहकारी अपचलनसम्बन्धी कुनै पनि कारोवारमा सहभागी नरहेको स्वघोषणा गर्नुपर्नेछ।

स्वार्थ बाझिने अवस्थाबारे पनि पार्टीले स्पष्टता मागेको छ। उम्मेदवारले आफूले उम्मेदवारी दिन लागेको पालिकामा निर्माण, ठेक्का, खरिद वा उपभोक्ता समितिमा आफू वा परिवारको व्यवसायिक संलग्नता भए नभएको तथ्य प्रस्तुत गर्नुपर्नेछ।

त्यस्तै, विचाराधीन मुद्दा तथा कानुनी विवादसम्बन्धी विवरण पनि खुलाउनुपर्नेछ। यदि अदालत वा अन्य न्यायिक/अर्धन्यायिक निकायमा फौजदारी, ठगी, भ्रष्टाचार वा गम्भीर देवानी मुद्दा चलिरहेको भए सोको यथार्थ स्थिति उल्लेख गर्नुपर्ने मापदण्ड राखिएको छ।

रास्वपाले स्थानीय तहका उम्मेदवारका लागि कडा र विस्तृत मापदण्ड प्रस्तुत गरे पनि आफ्नै शीर्ष नेतृत्वमाथि उठेका मुद्दा भने उस्तै गरी प्राथमिकतामा परेको देखिन्न, जसले यसको नैतिकतामाथि प्रश्न उठाइरहेको छ।