काठमाडौं । साताको पहिलो कारोबार दिन सोमबार सेयर बजारको परिसूचक नेप्से ३४.६३ अंकले घटेको छ। यससँगै नेप्से २७०४ अंकमा कायम भएको छ।

कारोबार सुरु भएको पहिलो १० मिनेटसम्म बजारले सामान्य वृद्धिको संकेत देखाए पनि त्यसपछि अन्त्यसम्म लगातार ओरालो लागेको थियो।

आजको गिरावटसँगै सेयर बजार लगातार चौथो कारोबार दिन घटेको हो। यसअघि मंगलबार २६ अंक, बुधबार २५ अंक र बिहीबार ५ अंकले बजार घटेको थियो भने शुक्रबार सार्वजनिक बिदाका कारण कारोबार भएको थिएन।

आज कारोबार रकम पनि घटेको छ। अघिल्लो दिन ४ अर्ब ९१ करोडको कारोबार भएकोमा आज ४ अर्ब २६ करोडमा सीमित भयो। कुल २७ कम्पनीको मूल्य बढ्दा २४० कम्पनीको मूल्य घट्यो भने २ कम्पनीको मूल्य स्थिर रह्यो।

माइक्रोफाइनान्स बाहेक सबै समूहका सूचक घटेका छन्। माइक्रोफाइनान्स समूह भने करिब १ अंकमुनि हरियो रह्यो। जलविद्युत्, विकास बैंक र उत्पादन तथा प्रशोधन समूह २ प्रतिशतभन्दा बढीले घटे।

अन्य समूहहरूमा बैंकिङ ०.८६, विकास बैंक २.१४, फाइनान्स ०.९६, होटल तथा पर्यटन १.३५, जलविद्युत् २.२३, लगानी १.३६, जीवन बीमा ०.४९, उत्पादन तथा प्रशोधन २.५४, निर्जीवन बीमा ०.९३, अन्य ०.५० तथा व्यापार १.३८ प्रतिशतले घटेका छन्।

आजको कारोबारमा फर्वार्ड माइक्रोफाइनान्सको मूल्य सबैभन्दा धेरै १५ प्रतिशतले बढेको छ। त्यसैगरी झापा इनर्जीको मूल्य ७.९९ प्रतिशतले बढेको छ। मूल्य वृद्धिमा ऋणपत्र अगाडि देखिएका छन्।

त्यस्तै, कर्पोरेट डेभलपमेन्ट बैंकको मूल्य सबैभन्दा धेरै १२.५८ प्रतिशतले घटेको छ। माइखोला हाइड्रोपावर ८.५९, नारायणी डेभलपमेन्ट बैंक ८.५६ तथा साल्पा विकास बैंक ८.०१ प्रतिशतले घटेका छन्।

आज धेरै कारोबार भएका कम्पनीमा एनआरएन इन्फ्रास्ट्रक्चर, रिलायन्स स्पिनिङ मिल्स, नेसनल हाइड्रोपावर, आँखुखोला जलविद्युत् कम्पनी र एनआईसी एसिया बैंक रहेका छन्।