काठमाडौं। सम्पत्ति शुद्धीकरण विभागले बागमती प्रदेशका मुख्यमन्त्री इन्द्रबहादुर बानियाँ विरुद्ध अनुसन्धानलाई तीव्र बनाउँदै पक्राउ गरेरै छानबिन गर्ने विषयमा कानुनी परामर्श गरिरहेको जनाएको छ।

विभाग स्रोतका अनुसार बानियाँको घर तथा कार्यालयमा छापा मारेर महत्त्वपूर्ण कागजपत्र नियन्त्रणमा लिएपछि अब थप अनुसन्धानको प्रकृतिबारे छलफल भइरहेको छ। ‘कागजपत्र नियन्त्रणमा लिएका छौं, आवश्यक परे पक्राउ गरेरै अनुसन्धान गर्नुपर्ने हुन सक्छ,’ स्रोतले जनाएको छ।

बानियाँ यसअघि ‘ए’ वर्गका ठेकेदारसमेत रहेको पृष्ठभूमिमा अवैध सम्पत्ति आर्जन तथा सम्पत्ति लुकाएको आशंकामा विभागले अनुसन्धान अघि बढाएको हो। सोही क्रममा हेटौँडाको सानोपोखरास्थित बानियाँ निर्माण सेवा (बीएनएस) कार्यालय र निवासमा छापा मारिएको छ।

त्यस्तै काठमाडौंको नक्साल र सुन्धारास्थित स्थानहरूमा समेत विभागले छानबिन गरेको जनाएको छ। छापामार कारबाहीका क्रममा विभिन्न कागजात र आर्थिक विवरणहरू संकलन गरिएको बताइएको छ।

नेपाली कांग्रेस का बागमती प्रदेश सभापतिसमेत रहेका बानियाँ केही वर्षअघिसम्म निर्माण व्यवसायमा सक्रिय थिए। हाल पनि विभिन्न व्यावसायिक कम्पनीहरूमा उनको लगानी रहेको विभागको प्रारम्भिक निष्कर्ष छ।

विभागले संकलित प्रमाणका आधारमा थप अनुसन्धान अघि बढाइने र आवश्यक परे कानुनी प्रक्रिया अनुसार कारबाही गरिने जनाएको छ।