एजेन्सी । हर्मुज जलडमरूमध्य मा सोमबार दक्षिण कोरियासँग सम्बन्धित एक जहाजमा विस्फोट भई आगलागी भएको दक्षिण कोरियाको विदेश मन्त्रालय ले जनाएको छ।

पानामाको झण्डा बोकेको उक्त जहाजमा ६ जना दक्षिण कोरियालीसहित २४ जना चालक दलका सदस्य सवार रहेका थिए। विस्फोट हुनुअघि जहाज संयुक्त अरब अमिरात नजिकैको समुद्री क्षेत्रमा रोकिएको थियो।

मन्त्रालयका अनुसार हालसम्म कुनै मानवीय क्षतिको विवरण प्राप्त भएको छैन। विस्फोट र आगलागीको कारण भने तत्काल खुल्न नसकेको र क्षतिको विस्तृत विवरण संकलन भइरहेको जनाइएको छ।

‘सरकारले यस विषयमा सम्बन्धित देशहरूसँग निकट समन्वय गर्नेछ र हर्मुज जलडमरूमध्यभित्र रहेका आफ्ना जहाज तथा चालक दलको सुरक्षाका लागि आवश्यक कदम चाल्नेछ,’ मन्त्रालयले जनाएको छ।

पश्चिम एसियामा जारी द्वन्द्व सुरु भएयता दक्षिण कोरियासँग सम्बन्धित करिब २६ वटा जहाज उक्त जलडमरूमध्य क्षेत्रमा प्रभावित भएको बताइएको छ।